السلام عليكم ورحمة الله وبركاته
تدوينة اليوم طرأت فكرتها في عقلي أول ما اشتريت الأجندة حقتي السنوية وتحمست أكثر لما شفت تحمس بنات نافذة المدونات لأجندتهم 
بس قبل ما أبدأ أوريكم أجندتي الجميلة والله 
بأحكيكم شوية عني مع التخطيط ..
أنا إنسانة تحب التنظيم والتخطيط من زمان ! وإن كان فيه مراحل في حياتي مليئة بالفوضى بس شنسوي المدرسة و الجامعة الله يهديها -> أمزح 
“جد بدأت الحمد لله أسيطر بشكل أكبر عالفوضى من يوم بديت أقلل الأشياء الي أملكها “مينيماليزم”
المهم بدأت تقريبًا من أربع سنوات أخطط ليومي وأحاول أكتب ايش بأسوي اليوم في دفتر أنا أصممه أو آخذه من النت وأطبعه. قبلها أخذت أجندة من جرير وكانت مرررة جميلة بس ما استغليتها بقدر جمالها للأسف, وما أدري هل هي موجودة في جرير للحين أو لا, اشتريت تطبيق في الآيباد بلانر بس اكتشفت إني مو مرة مع التخطيط بالتكنولجيا, وأغلب شيء كنت أخطط في عقلي بس سبحان الله مو زي لما تنكتب, لما تنكتب ما تشيلين هم إنك تنسينها, وتقدرين ترتبين بسهولة ايش الأولويات وتسعين لتحقيق المكتوب وشطبه من القائمة “أو وضع علامة إنه تم” لما تنجزينه.
بعدها بدأت أشتري من الأجندة الجاهزة مرة ثانية بس باهتمام أكثر, أخذت سنة الي يجيك كل أيام الأسبوع في صفحتين وبعدها حول 10 ورقات أو أزود للملاحظات نهاية الدفتر, وتقويم سنوي كامل وقدام كل يوم مساحة صغييرة أكتب فيها حدث مميز في هذا اليوم ..وتقريبًا هذا أبرز شيء كان فيه 
السنة الي بعدها لاحظت إني أحب المساحة الأكبر في الكتابة فأخذت أجندة كل يوم ورقة , حجم الأجندة ما كان كبير ,يدخل شنطتي اليدوية بسهولة وهذي ميزة, فيها نفس سالفة المساحة الصغيرة لكل يوم في السنة بس ما كان فيها ورقات للملاحظات في النهاية أبدًا. المساحة الكبيرة كانت مريحة بالنسبة لي بس برضه ما حسيت بعد فترة من استعمالها إن هذي الأجندة الي أبغى أكمل عليها..بقية سنين حياتي .
بالنسبة لهذي السنة, والشيء الي مخليني مرة متحمسة أكتب عن الأجندة حقتها, لقيت الحمد لله النوع الي أحسه مررة يناسبني, مرة يساعد عالتخطيط ومراقبة النفس بعون الله طبعًا أولا وآخرًا . قبلها كنت أفكر في طريقة Bullet و هي إن الواحد هو يسوي أجندته في دفتر سادة وحسيتها ممتعة بس تاخذ وقت ! وأنا ما أبغى يروح وقت في تزيين دفتر تخطيطاتي صراحة + ما أعتبر نفسي رسامة محترفة. ففضلت الدفاتر الجاهزة بس مو أي دفتر لأني جربت نوعين قبل..وما حبيت أكمل على واحد منهم.
في محل تكي ماكس يجيبون بضاعات استثنائية لفترة بسيطة, وعندهم قسم للأجندات, رحت أقلب في الأجندة حقتهم وصراحة كلها جميلة خارجيا وداخليا بس أجمل واحد بالنسبة لي والي مرة خلاص هو بطل قصتنا لليوم .
“النجمات آثار سارة الله يحفظها وحبيت أخليها”
هو تابع لموقع Orange circle studio
http://www.orangecirclestudio.com/
وللأسف حاليا ما يوصل لغير أمريكا وبريطانيا حسب مو مكتوب في موقعهم .
حجمه كبير, أول مرة آخذ بهذا الحجم وبداخلي خوف صغير إني أندم بعدين لأنه بيكون صعب الحمل في كل مكان, بس للحجم الكبير ميزة وهو إنه يخليك تدخلين جو مرة في التخطيط->اقتنعوا رجاءً 
المهم غلافه من برا جميل,لون أزرق يا جماعة.. كنت أطمح لواحد أعجبني غلافه مرة أعجبني كذا أزرق ونجوم بس هذا ميزاته جوا ناسبتني أكثر وحتى الأزرق والورود مش بطال.
نجي لأول ما نفتحه باسم الله في صفحة تعريف بالذات واسمك وايميلك ورقم جوالك واسم ورقم شخص للطواريء.طبعا هذي تنفع في حالات منها لو لا قدر الله ضاع الدفتر يقدر الي لقيه يتواصل معك.
وفي نفس الصفحة معلومات عن الشركة المنتجة ورموز صغيرة عن حالات القمر
في الصفحة الي جنبها إجازات وأيام سنة 2018 مرتبة حسب الشهور.
نجي بعدها لتقويم سنوي عام لسنة 2017 وسنة 2018 وسنة 2019
وتحت كل سنة أربع سطور لملاحظات عامة, ممكن تنكتب فيها أهداف السنة الكبيرة.
بعدها هذي الصفحة الي عبارة عن تواريخ مميزة, صراحة ما فهمت تمامًا ايش فكرتها, لكن أتخيل بالنسبة للصخور إن كل شهر يقابله صخرة مميزة له.
بالنسبة لسنة الصينينين فاكتشفت إنهم يسمون كل سنة باسم حيوان
فمثلاً هذي السنة الجاية بتكون سنة الكلب, الي بعدها سنة الخنزير, الي بعدها الفأر . حزروا ايش يعني Ox؟
نبدأ في الجد, يجي بعد صفحة التواريخ المميزة صفحة التخطيط الشهري..واضحة فيها حالات القمر وفي الجنب فيه مساحة للكتابة أتخيلها ممتازة للأحداث المميزة لهذا الشهر ..
بالنسبة للأهداف فمكانها في الصفحة الي بعدها, وهي أكثر صفحة حسيت بقد ايش من جد ترتب الواحد, هي أكثر شيء خلاني أفضل هذي الأجندة عن غيرها.
تكتبين أهداف الشهر في العمود عاليسار, وعندك قدام كل هدف واحد ثلاثين مربع على عدد أيام الشهور ولما تنجزين الهدف تظللين المربع أو تحطين علامة .. 
مو شرط يكون الهدف كل يوم, مثلا أنا واحد من الأهداف إني أكتب 4 تدوينات كل شهر. فإذا كان عدد المربعات المظللة قدام هذا الهدف 4 بأكون حققت الهدف الحمد لله !
أحس هذي المساحة مرة ممتازة بعد للأهداف اليومية بدل ما أقعد أكرر كتابتها كل يوم خلاص أكتفي بها .
تحت هذا الجدول تغذية راجعة عن الشهر, أشياء نجحت في الوصول لها, أشياء أحتاج أطورها في نفسي, أشياء أنا ممتنة لها, أفضل اللحظات لهذا الشهر وأسوأ اللحظات لهذا الشهر, استغربت وجود آخر خانة بس قلت يمكن قصدهم الواحد لما يتخطى هذي اللحظات الصعبة يقدر يتذكر كيف خرج منها, أو يتعلم دروس منها..على كل الله يجعل كل أيامنا سعادة ورضا وطمأنينة .
يستمر معنا هذا التخطيط الشهري ووراه جدول الأهداف والتغذية الراجعة لحد ما تخلص كل الشهور.
بعدها يبدأ التخطيط اليومي
كل أسبوع في صفحة وحدة, بس المساحة كبيرة + ما يحتاج أكتب كل شيء لأن في أشياء أصلًا خلاص تنكتب في جدول الأهداف .
ما فيه مساحة خاصة بأهداف كل أسبوع, بس برضو أتخيل يمدي نزبط هالأمر من خلال جدول الأهداف الشهري 
بعد ما تخلص كلل الشهور تجي عندنا صفحة تقييم أيام السنة, مربعات على عدد أيام السنة وأنا أحدد رسومات معينة لمزاج الأيام يعني مثلا وجه عيونه قلوب معناها يوم عظيم, وجه مبتسم معناها يوم جيد ..يوم يعني, يوم سيء, يوم مروع الله يروع العدو..
الصفحة الي بعدها صفحة الأهداف أو الأمنيات الي الشخص يتمنى يحققها في حياته.. ما أدري هل الفيلم استند عليها أو هي انتشرت من فيلم دخل فيه واحد كبير في السن غني المستشفى وتقابل مع عامل فقير هناك برضه كبير في السن وصاروا أصحاب, ولأنه بقيلهم أيام معدودة قرروا يسوون كل الي كانوا يتمنونه في حياتهم وسووا هذي القائمة ..صراحة ما شفت الفيلم لكن كذا تقريبا قصته من الوصف . كنسلوا الوصف إذا كان غلط 
المهم, أشوفها فكرة جميلة الواحد أحيانًا عنده أحلام لحياته كلها مثلاً إنه يسافرالمكان الفلاني أو يملك مليون ريال أو يطير بالمنطاد أو أو أشياء زي هيك .
الصفحتين الي بعدها اسمها to do list and to not to do قائمة ال افعل وقائمة ال لا تفعل
أتخيل إن هذي تتعلق بالمباديء أكثر من إنها للمهام اليومية, مثلا في قائمة ال لا تفعل نحط : عدم التأخر عن المواعيد أبدا, عدم أكل الحلا أكثر من يوم في الأسبوع, في قائمة ال افعل مثلا الابتسامة للناس دائمًا, عدم الغيبة, صلة الرحم..الخ
الصفحتين الي بعدها تتعلق بالميزانية حاطين قائمة فيها الراتب الشهري كم, وتحته نوزع قد ايش راح منه عالمصاريف المكتوبة زي آجار البيت والغاز والكهرباء والجوال والنت والمويه وأشياء أُخر . وفيه مساحة لملاحظات بسيطة
وتحتها مساحة لكم ادخرت .
بعدها حوالي 10 صفحات فاضية, أنا قررت أقسمها إني أخلي صفحة للكتب الي أبغى أقرأها , صفحة لأفكار التدوينات, صفحة لأشياء أبغى أشتريها, أعمال يدوية أبغى أسويها .. كذا
بعدها صفحة ستيكرز وبعدها جيب أحط فيه الأوراق المهمة وكذا
الحين الأشياء الي اشتريتها مع هذا المخطط كالتالي
دفتر سادة عشان أخطط فيه بعمق, مثلاً لما بأكتب تدوينة لازم أكتب ايش العناصر الي أبغاها تكون موجودة وايش بأركز عليه وايش بكتب وما بكتب وكذا .
لو بسوي عمل يدوي من اليوتيوب أرسم الباترون أو أكتبه في الدفتر.
لو بأرسل رسالة مهمة لأحد ما أكتبها أول فيه كمسودة وأعدل عليها
أخذت ستكرات أشكال غير , أشكال صبار حبيت شكلها مرة والثانية عبارات تحفيزية برضو حبيتها .
وبس كذا خلصت التقرير عن أجندتي لهذي السنة 
غالبًا لأني في بلد تستعمل التقويم الميلادي أسهل لي أستعمل أجندة بهذا التقويم, لكني جد أرجو أن أستعمل الأجندة الهجرية فيما بعد بإذن الله لأنه هو تأريخنا كمسلمين وعرب 
ولأني مغرمة بصفحة الأهداف الشهرية وإنجازها فكرت أسوي تصميم مشابه لها جاهز للتحميل والطباعة
بالتوفيق أجمعين 
حكاية طويلة 
حبييت فكرة وجوه القمر 😍😍❤
حسيتها كمان تنفع لصيام البيض وبشكل عام تسهل لك تخمين انتي في أي يوم في الشهر الهجري 👌🏼
الله يسعدك ما جت ببالي فكرة الأيام البيض أبدا والحين نبهتيني لها
شفتي كيف الجمال 😍😃
حبيت الاستيكرات 😭😭😭💖
وانا بعد والله 😍💘😆
الأجندة وفكرته فيه كل شيء مهم للتخطيط مرا عجبني والاستيكرات لطيفة
الله يسعدك يا رب شكرا لردك اللطيف
الله مرا حبيته 😍 كويس اني شفته قبل لا اشتري
حبتك العافية يا رب
تسلم لي عيونك 😙
مررة جميلة الاجندة .. حبيت الاستكرات اللي دخليتها
بالتوفيق يارب وسنة جميلة
الله يوفقك يا رب ويجمل حالك💙
واو جداً لطيف ، التنظيم والتخطيط شيء لذيذ يرتب المخ بشكل كبير ..
سنتك جميلة ومنجزه يارب 🙂
فعلا ع قولك شيء لذيذ والألذ منه لما تنجزين الي خططتي له
شكرا لردك وأجمعين يا رب 💘