السلام عليكم ورحمة الله وبركاته 

تدوينة اليوم  طرأت فكرتها في عقلي أول ما اشتريت الأجندة حقتي السنوية وتحمست أكثر لما شفت تحمس بنات نافذة المدونات لأجندتهم heart

بس قبل ما أبدأ أوريكم أجندتي الجميلة والله  بأحكيكم شوية عني مع التخطيط ..

أنا إنسانة تحب التنظيم والتخطيط من زمان ! وإن كان فيه مراحل في حياتي مليئة بالفوضى بس شنسوي المدرسة و الجامعة الله يهديها -> أمزح 

 “جد بدأت الحمد لله أسيطر بشكل أكبر  عالفوضى من يوم بديت أقلل الأشياء الي أملكها “مينيماليزم” 

المهم بدأت تقريبًا من أربع سنوات أخطط ليومي وأحاول أكتب ايش بأسوي اليوم في دفتر أنا أصممه أو آخذه من النت وأطبعه. قبلها أخذت أجندة من جرير وكانت مرررة جميلة بس ما استغليتها بقدر جمالها للأسف, وما أدري هل هي موجودة في جرير للحين أو لا, اشتريت تطبيق في الآيباد بلانر بس اكتشفت إني مو مرة مع التخطيط بالتكنولجيا, وأغلب شيء كنت أخطط في عقلي بس سبحان الله مو زي لما تنكتب, لما تنكتب ما تشيلين هم إنك تنسينها, وتقدرين ترتبين بسهولة ايش الأولويات وتسعين لتحقيق المكتوب وشطبه من القائمة “أو وضع علامة إنه تم” لما تنجزينه.smiley

بعدها بدأت أشتري من الأجندة الجاهزة مرة ثانية بس باهتمام أكثر, أخذت سنة الي يجيك كل أيام الأسبوع في صفحتين وبعدها حول 10 ورقات أو أزود للملاحظات نهاية الدفتر, وتقويم سنوي كامل وقدام كل يوم مساحة صغييرة أكتب فيها حدث مميز في هذا اليوم ..وتقريبًا هذا أبرز شيء كان فيه emoticons

السنة الي بعدها لاحظت إني أحب المساحة الأكبر في الكتابة فأخذت أجندة كل يوم ورقة , حجم الأجندة ما كان كبير ,يدخل شنطتي اليدوية بسهولة وهذي ميزة, فيها نفس سالفة المساحة الصغيرة لكل يوم في السنة بس ما كان فيها ورقات للملاحظات في النهاية أبدًا. المساحة الكبيرة كانت مريحة بالنسبة لي بس برضه ما حسيت بعد فترة من استعمالها إن هذي الأجندة الي أبغى أكمل عليها..بقية سنين حياتي .emoticons

 

بالنسبة لهذي السنة, والشيء الي مخليني مرة متحمسة أكتب عن الأجندة حقتها, لقيت الحمد لله النوع الي أحسه مررة يناسبني, مرة يساعد عالتخطيط ومراقبة النفس بعون الله طبعًا أولا وآخرًا . قبلها كنت أفكر في طريقة Bullet و هي إن الواحد هو يسوي أجندته في دفتر سادة وحسيتها ممتعة بس تاخذ وقت ! وأنا ما أبغى يروح وقت في تزيين دفتر تخطيطاتي صراحة + ما أعتبر نفسي رسامة محترفة. ففضلت الدفاتر الجاهزة بس مو أي دفتر لأني جربت نوعين قبل..وما حبيت أكمل على واحد منهم.emoticons

 

في محل تكي ماكس يجيبون بضاعات استثنائية لفترة بسيطة, وعندهم قسم للأجندات, رحت أقلب في الأجندة حقتهم وصراحة كلها جميلة خارجيا وداخليا بس أجمل واحد بالنسبة لي والي مرة خلاص هو بطل قصتنا لليوم .love

أجندة

النجمات آثار سارة الله يحفظها وحبيت أخليها

هو تابع لموقع Orange circle studio

http://www.orangecirclestudio.com/

وللأسف حاليا ما يوصل لغير أمريكا وبريطانيا حسب مو مكتوب في موقعهم .emoticons

حجمه كبير, أول مرة آخذ بهذا الحجم وبداخلي خوف  صغير إني أندم بعدين لأنه بيكون صعب الحمل في كل مكان, بس للحجم الكبير ميزة وهو إنه يخليك تدخلين جو مرة في التخطيط->اقتنعوا رجاءً  emoticons

المهم غلافه من برا جميل,لون أزرق يا جماعةheart.. كنت أطمح لواحد أعجبني غلافه مرة أعجبني كذا أزرق ونجوم بس هذا ميزاته جوا ناسبتني أكثر وحتى الأزرق والورود مش بطال.heart

مخطط

نجي لأول ما نفتحه باسم الله في صفحة تعريف بالذات واسمك وايميلك ورقم جوالك واسم ورقم شخص للطواريء.طبعا هذي تنفع في حالات منها لو لا قدر الله ضاع الدفتر يقدر الي لقيه يتواصل معك.

وفي نفس الصفحة معلومات عن الشركة المنتجة ورموز صغيرة عن حالات القمر 

في الصفحة الي جنبها إجازات وأيام سنة 2018 مرتبة حسب الشهور. 

أجندة

نجي بعدها لتقويم سنوي عام لسنة 2017 وسنة 2018 وسنة 2019 

وتحت كل سنة أربع سطور لملاحظات عامة, ممكن تنكتب فيها أهداف السنة الكبيرة.

مخطط

بعدها هذي الصفحة الي عبارة عن تواريخ مميزة, صراحة ما فهمت تمامًا ايش فكرتها, لكن أتخيل بالنسبة للصخور إن كل شهر يقابله صخرة مميزة له.smiles

بالنسبة لسنة الصينينين فاكتشفت إنهم يسمون كل سنة باسم حيوان 

فمثلاً هذي السنة الجاية بتكون سنة الكلب, الي بعدها سنة الخنزير, الي بعدها الفأر . حزروا ايش يعني Ox؟

أجندة

نبدأ في الجد, يجي بعد صفحة التواريخ المميزة صفحة التخطيط الشهري..واضحة فيها حالات القمر وفي الجنب فيه مساحة للكتابة أتخيلها ممتازة للأحداث المميزة لهذا الشهر ..

بالنسبة للأهداف فمكانها في الصفحة الي بعدها, وهي أكثر صفحة حسيت بقد ايش من جد ترتب الواحد, هي أكثر شيء خلاني أفضل هذي الأجندة عن غيرها.heart with arrow

20171226_1128491.jpg

تكتبين أهداف الشهر في العمود عاليسار, وعندك قدام كل هدف واحد ثلاثين مربع على عدد أيام الشهور ولما تنجزين الهدف تظللين المربع أو تحطين علامة .. kitty

مو شرط يكون الهدف كل يوم, مثلا أنا واحد من الأهداف إني أكتب 4 تدوينات كل شهر. فإذا كان عدد المربعات المظللة قدام هذا الهدف 4 بأكون حققت الهدف الحمد لله !

أحس هذي المساحة مرة ممتازة بعد للأهداف اليومية بدل ما أقعد أكرر كتابتها كل يوم خلاص أكتفي بها .

تحت هذا الجدول تغذية راجعة عن الشهر, أشياء نجحت في الوصول لها, أشياء أحتاج أطورها في نفسي, أشياء أنا ممتنة لها, أفضل اللحظات لهذا الشهر وأسوأ اللحظات لهذا الشهر, استغربت وجود آخر خانة بس قلت يمكن قصدهم الواحد لما يتخطى هذي اللحظات الصعبة يقدر يتذكر كيف خرج منها, أو يتعلم دروس منها..على كل الله يجعل كل أيامنا سعادة ورضا وطمأنينة .

يستمر معنا هذا التخطيط الشهري ووراه جدول الأهداف والتغذية الراجعة لحد ما تخلص كل الشهور.

بعدها يبدأ التخطيط اليومي 

planner

كل أسبوع في صفحة وحدة, بس المساحة كبيرة + ما يحتاج أكتب كل شيء لأن في أشياء أصلًا خلاص تنكتب في جدول الأهداف .

ما فيه مساحة خاصة بأهداف كل أسبوع, بس برضو أتخيل يمدي نزبط هالأمر من خلال جدول الأهداف الشهري star

مزاج كل يوم

بعد ما تخلص كلل الشهور تجي عندنا صفحة تقييم أيام السنة, مربعات على عدد أيام السنة وأنا أحدد رسومات معينة لمزاج الأيام يعني مثلا وجه عيونه قلوب معناها يوم عظيم, وجه مبتسم معناها يوم جيد ..يوم يعني, يوم سيء, يوم مروع الله يروع العدو..

قائمة الأمنيات

الصفحة الي بعدها صفحة الأهداف أو الأمنيات الي الشخص يتمنى يحققها في حياته.. ما أدري هل الفيلم استند عليها أو هي انتشرت من فيلم دخل فيه واحد كبير في السن غني المستشفى وتقابل مع عامل فقير هناك برضه كبير في السن وصاروا أصحاب, ولأنه بقيلهم أيام معدودة قرروا يسوون كل الي كانوا يتمنونه في حياتهم وسووا هذي القائمة ..صراحة ما شفت الفيلم لكن كذا تقريبا قصته من الوصف . كنسلوا الوصف إذا كان غلط 

المهم, أشوفها فكرة جميلة الواحد أحيانًا عنده أحلام لحياته كلها مثلاً إنه يسافرالمكان الفلاني  أو يملك مليون ريال أو يطير بالمنطاد أو أو أشياء زي هيك .

to do

الصفحتين الي بعدها اسمها  to do list and to not to do قائمة ال افعل وقائمة ال لا تفعل 

أتخيل إن هذي تتعلق بالمباديء أكثر من إنها للمهام اليومية, مثلا في قائمة ال لا تفعل نحط : عدم التأخر عن المواعيد أبدا, عدم أكل الحلا أكثر من يوم في الأسبوع, في قائمة ال افعل مثلا الابتسامة للناس دائمًا, عدم الغيبة, صلة الرحم..الخ 

ميزانية

الصفحتين الي بعدها تتعلق بالميزانية حاطين قائمة فيها الراتب الشهري كم, وتحته نوزع قد ايش راح منه عالمصاريف المكتوبة زي آجار البيت والغاز والكهرباء والجوال والنت والمويه وأشياء أُخر . وفيه مساحة لملاحظات بسيطة 

وتحتها مساحة لكم ادخرت . 

 

بعدها حوالي 10 صفحات فاضية, أنا قررت أقسمها إني أخلي صفحة للكتب الي أبغى أقرأها , صفحة لأفكار التدوينات, صفحة لأشياء أبغى أشتريها, أعمال يدوية أبغى أسويها .. كذا

ستيكرز

 بعدها صفحة ستيكرز وبعدها جيب أحط فيه الأوراق المهمة وكذا 

 

الحين الأشياء الي اشتريتها مع هذا المخطط كالتالي

دفتردفتر

دفتر سادة عشان أخطط فيه بعمق, مثلاً لما بأكتب تدوينة لازم أكتب ايش العناصر الي أبغاها تكون موجودة وايش بأركز عليه وايش بكتب وما بكتب وكذا .

لو بسوي عمل يدوي من اليوتيوب أرسم الباترون أو أكتبه في الدفتر.

لو بأرسل رسالة مهمة لأحد ما أكتبها أول فيه كمسودة وأعدل عليها 

ستكرز

أخذت ستكرات أشكال غير , أشكال صبار حبيت شكلها مرة والثانية عبارات تحفيزية برضو حبيتها .heart

 

وبس كذا خلصت التقرير عن أجندتي لهذي السنة robot

غالبًا لأني في بلد تستعمل التقويم الميلادي أسهل لي أستعمل أجندة بهذا التقويم, لكني جد أرجو أن أستعمل الأجندة الهجرية فيما بعد بإذن الله لأنه هو تأريخنا كمسلمين وعرب diamond

ولأني مغرمة بصفحة الأهداف الشهرية وإنجازها فكرت أسوي تصميم مشابه لها جاهز للتحميل والطباعة 

أهداف الشهر

 

بالتوفيق أجمعين heart

Posted by:molarya

.ig-b- { display: inline-block; } .ig-b- img { visibility: hidden; } .ig-b-:hover { background-position: 0 -60px; } .ig-b-:active { background-position: 0

13 رأيا حول “أجندة 2018

  1. حبييت فكرة وجوه القمر 😍😍❤
    حسيتها كمان تنفع لصيام البيض وبشكل عام تسهل لك تخمين انتي في أي يوم في الشهر الهجري 👌🏼

اترك تعليقًا على Rawan M. إلغاء الرد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s