عادات صحية بسيطة

السلام عليكم ورحمة الله وبركاته

في هذه التدوينة بأتكلم بعون الله عن عادات صحية, أو بالأحرى خطوات صحية لأن الشيء ما يصير عادة إلا بعد فترة من الاستمرار عليه, 66 يوم أو أكثر.. حسب هذا الرابط How Long Does it Actually Take to Form a New Habit? (Backed by Science)

 

هذي الخطوات, موجهة بشكل خاص للناس الي يبغون يبدأون حياة صحية ومو عارفين ايش يبدأون أو ايش يسوون, وللناس الي عارفين بس يحتاجون تذكير وتحفيز..زيي يعني

 

ايش رايكم نبدأ بأسهل جانب؟

1-المويه . 

عكس الدراسات الي تقولكم قد ايش جمال تأثير المويه في حياتكم إذا التزمتم بشربها بأقولكم أنا ايش حسيت لما جلست فترة أشرب مويه بالقطارة حرفيًا: الصداع كان مستمر معي, الخمول والكسل, الجوع المستمر حتى لما آكل, الكآبة!, غير إنه بشرتي تعبت, مع إن الفترة ما تجاوزت الأسبوع حتى.. من بعدها أنا مؤمنة تمامًا وجدًا بأهمية شرب المويه حتى لو كان ضرسك يوجعك اشربي بالمصاص لا مجال للاستسلام, بالنسبة للناس الي يتكاودون من كثرة الذهاب لبيت الراحة فهذي ترى في البداية وبعدها يتعود جسمك على هذا النظام, إذا ما تستسيغين طعم المويه أضيفي معه أشياء زي فواكه أو عصير الفواكه المركز, أنا ما أشجع على هذي النقطة لكن إذا فعلاً فعلاً ما بتشربين المويه إلا بهذا الشكل فأضيفي حول ملعقة طعام من هذا العصير المركز لكوب مويه أو أكثر ..

هذا العصير زي الفيمتو والسنكويك وكذا بس ميزته إنه ما فيه سكر مُضاف, السكر كله جاي من نفس الفاكهة حسب ما فهمت.

 

في أشياء ثانية ممكن تحافظين بها على رطوبة جسمك الداخلية مع المويه الي هي إنك تكثرين من الفواكه والخضار لأن فيها نسبة مويه برضه..

أول نقطة, المويه؟ تم ؟ يالله نشوف الي بعده ..

 

 

2-الخطوة الثانية خلي عندك مسودّة, ورقية أو في جوالك”فيه برامج خاصة لهذي النقطة  يالله نحسبها !بس إذا ما تحبين التعقيد خلك على المسودّة البسيطة” وفيها اكتبي كل شيء أكلتيه لليوم  وكل شيء شربتيه “حتى العصيرات لها سعرات والأشياء المشروبة عامة”وحاولي يكون بالوقت والكمية, لا تستحين من نفسك إنك تكتبين ايش المصايب الي أكلتيها, مع الأيام بتعرفين ايش يناسب جسمك وايش الي ما يناسبه, إذا في هذا اليوم حسيتي بطنك تغير وانتفخ راجعي المسودة وشوفي ايش اكلتي, إذا شفتي بعد أسبوع إن وزنك زاد ارجعي وشوفي ايش كان نظامك هذاك الأسبوع, أحيانًا الأكل يكون تمام وعال العال بس وقته غلط! , يعني مثلا مكرونة بر مع خضار منوعة وجبة صحية وغنية بالفوائد لكن ما تنفع تنوكل في الليل لأن خلاص معدل الحرق والحركة يقل ..أحسن شيء في الليل تاكلين وتشربين أشياء خفيفة .أحيانًا يكون الأكل كله صحي ووقته تمام بس كميته كبيرة والجهد الي بذلتيه لحرقه قليل.

3-الخطوة الثالثة الحركة, ما بأتكلم عن الرياضة هنا لأنها شيء معروف أظن خلاص, لكن قصدي بالحركة إن نخلي يومنا كله حركة, حتى لو سوينا الرياضة نستمر بالحركة طوال اليوم, غير إن لياقتك بترتفع بتحرقين أكثر..إذا كنتِ من الناس الي يجلسون كثير سوا عالجوال أو القراءة أو اللابتوب غيري وخلك واقفة وقت ما انتِ تسوين هذي الأشياء, بدل المصعد اختاري الدرج, العبي مع الصغار, سوي شغل البيت بانهماك وحرارة بس لا تتحمسين عشان ما تنكسر المكنسة ..

صح قلت ما بتكلم عن الرياضة, بس إذا انك من الناس الي شايلة فكرة الرياضة من حياتها ابدئي دخليها بأبسط شيء, المشي, حددي لنفسك أسبوع تمشين كل يوم 10 دقايق, الأسبوع الي بعده زودي على العشر دقايق 5 وهلم جرا..هذا في حالة إن عمرك وحياتك ما سويتي رياضة..

بعدها ابدئي دخلي الأثقال, الرقص, مارسي أنواع مختلفة من الرياضة عشان تعرفين نوعك المُفضل..

إذا ما حصل لك تروحين نادي سوي هذا النادي في بيتك, ما يحتاج إلا مساحة بسيطة من غرفتك وأدوات بسيطة, فيه تمارين حتى تعتمد على وزن الجسم لو ما عندك أثقال, وغالبية هذي الأماكن ما تحتاج مكان غير الي أنت واقفة أو منسدحة فيه.

4-الخطوة الرابعة ,عودي لسانك على الطعم الصحي! , لا تقولين مستحيل ما أتقبل الشاهي أو القهوة إلا بسكر, لا تقولين مستحيل ما آكل إلا رز أبيض أو جربت الرز البني أو البديل الفلاني الصحي وما ناسبني أو الأكل وهو مليان دسم ألذ من الي لا !

كلنا كنا كذا في البداية عزيزتي, لكن الواحد يعود نفسه, وبعد ما تتعود النفس تصير ما تستطعم إلا الشيء الصحي, قد قريت مرة ومو متذكرة المكان أو المصدر لكنه منطقي تمامًا ومُجرب بعد, الناس المتعودة تشرب الشاهي حالي بعد 10 مرات من شربه بدون سكر, بيصير سهل عليها وخلاص مستساغ..

ما تشوفون أحيانًا ناس تشرب من فنجال أو تاكل أكل وتقول مرررررة حالي وناس ثانية تقول لا بالعكس طبيعي؟ لأن هذولاك متعودين عالأكل الي حلاه قليل فلما يجربون أو تجرب شيء حتى لو نسبة الحلا فيه قليلة, حليمات التذوق في لسانها تشوفه قوي مرة.. اوصلي لهذي المرحلة يا بطلة ..

 

وترا مو معنى هذا الكلام إن الطعم الصحي مو لذيذ, ترا فيه وصفات وابتكارات وبدائل وهيك مرة لذيذة وألذ حتى , بس برضو للأمانة يعني الأكل الشرير يبقى ألذ أحيانًا عشان كذا نرجع ونقول عودي لسانك على الطعم الصحي .

5- الصباح رباح, و (اللهم بارك لأمتي في بكورها), حاولي في هذا الوقت تكونين مستيقظة , قياس الوزن أفضل في هذا الوقت, الفطور وقته في هذا الوقت , غالبًا لو سويتي رياضتك في الصباح بترتاحين وتحسين بالإنجاز..وما بتكونين عرضة لكنسلتها قد لو إنك أجلتيها لوقت متأخر من اليوم.. الأمر المتعلق بهذي الخطوة الي هي مسألة النوم, قد ما يمديك وتقدرين عدلي نومك, أعرف معاناة الأمهات لسا أولادهم ما تحدد لهم نمط معين في النوم وقلبي معاكم والله يعينكم يا رب ويكتب أجركم <3, لكن الناس الي مو مربوطة بأحد أو ملتزمة بشيء ايش العذر ؟ الليل رواق ؟ أدري! بس برضو الليل سكن..ناموا في الليل واصحوا الفجر بدري مرة أو حتى قبل الفجر بساعة وبيكون رواق وبركة سبحان الله..

6-أضفت هذي النقطة لأن لها تأثير كبير جدًا بفضل الله تعالى الي هي إنه أحيطي نفسك بناس صحية, حساباتك الي تتابعينها في الانستقرام؟ في تويتر؟ في سناب ؟ خليها كلها أو أغلبها حسابات صحية,وصفات صحية,ناس رياضيين..لاحظت نفسي فترة كنت مضيفة حسابات طبخ كثيرة”طبخ شرير لذيذ” وكنت مرة أشتهي وأتحمس أسوي زي طبخاتهم لما أشوفها, لما حذفتها وخليت كل قائمة حساباتي حقت الطبخ ناس صحية صرت أتحمس للطبخ الصحي..

اقرئي وشوفي واسمعي عن الحياة الصحية, وخلي محيطك الاجتماعي كله حسابات ناس صحيين, بتتحفزين وتتحمسين للحياة الصحية باستمرار.

7-آخر شيء وأهم شيء أشوفه بعد: الدعاء. لا تستخسرين إنك تدعين إن الله يوصلك لطموحك بالنسبة لجسمك, إن الله يعطيك الجسم المثالي والصحة والعافية والقوة..ادعي كل يوم من قلبك وربي سبحانه بفضله ورحمته بيسخر لك .

 

و بس ما بطول عليكم زيادة عشان ما تستصعبونها ..بأختصر لكم الكلام الي فوق كله ..

إذا تبغين دليل بسيط لبداية صحية :

1-شوفي قد ايش تشربين مويه وخذي احتياج جسمك كامل.

2-سجلي أكلك بالوقت والكمية ولاحظي تأثيره عليك.

3-كثري حركتك خلال اليوم وابدأي رياضة بالتدريج من 10 دقايق.

4-عودي لسانك على الطعم الصحي.

5-نامي في الليل واصحي في الفجر !

6-أحيطي نفسك بناس صحية سواء في الحياة الواقعية أو الافتراضية.

7-ادعي بيقين و استمرار .

 

*كل الصور من موقع pintrest

بالتوفيق أجمعين .