سلامٌ عليكم جميعًا..

من المُفترض إني أرجع رجعة قوية بعد استراحة المُحارب الي استمرت كم يوم في تحدي نافذة المدونات,

لكن بأرجع رجعة لطيفة,خفيفة.. إن شاء الله خفيفة 😂

المهم, في أحد الأيام الفائتة كان فيه اجتماع النادي السعودي الأول هذي السنة, ومن ضمن فقرات الحفل البسيطة مسابقات للأطفال, ومن وجهة نظري وخبرتي المتواضعة في ذلك اليوم فالأطفال فعلاً يحبون المسابقات ويتفاعلون معها بشكل أخّاذ..وإذا كنتم مُخططين في جمعة من الجمعات تسوون مسابقات للأطفال سووها وخلوا في بالكم كم مسابقة لما بعد النهاية, لما تعلنون إنه خلاص خلصت المسابقات ويطالعونكم بعيون الي هل من مزيد, يمكن يقولونها بعد مو بس يطالعون, عشان لما تقولون ايوه باقي مسابقة وتشوفون الفرحة تنطط قدامكم, تفرحون بعد ..😍

الزبدة مسابقات الأطفال دئمًا ما يكون إعدادها, والتفاعل معها, ممتع وحيوي ..

في هذي التدوينة بأذكر لكم بعض المسابقات الي سويتها في الاجتماع + بأذكر لكم حاجة ثانية إن شاء الله ..

 

المسابقة الأولى تحتاج شوية أغراض بسيطة :

كور ملونة + 4 سلات غسيل +2 غطاء للعين” من أي قطعة قماش”

ميزة سلات الغسيل الي زي كذا أو القماشية إنه يمديك تطوينها فما تاخذ مكان كبير معك إذا كان الاجتماع برا بيتك

لهذي المسابقة بتحتاجين 6 أطفال, 3 يكونون فريق, و3 يكونون فريق ثاني ..

مسابقة

الطفل 3 هو الي يتحرك ياخذ من السلة الأولى ويحط في السلة الثانية “يكون فيه مسافة بين السلتين” وهو مغمض..

وظيفة الأطفال الي عند السلال إنهم يدلونه عالطريق, ممنوع يمسكونه أو يعطونه كور أو يحطون الكور الي طاحت منه في السلة, بس يقولون له يمين يسار طوالي زي كذا .

نحدد وقت مثلاً 3 دقايق وبعدها نوقف المسابقة !

بعدها نعدّ كل فريق كم نقل كورة والفريق الي نقل كور أكثر هو الفايز..

ممكن إذا كانت لناس كبار شوية يصير فيها شوية حماس إنه الكور الحمراء تنقص نقطة والزرقاء تحسب نقطتين وزي كذا..أو تجلس ببساطة كل كورة=نقطة.

 

المسابقة الثانية :نشر الملابس..

 

laundryline20small

 

نحتاج : خيطين أو حبلين لكل فريق حبل +مشابك غسيل سواء صغيرة أو كبيرة+ ملابس عروسة أو أوراق مقصوصة على شكل ملابس.

نفس الفكرة نحتاج 6 أطفال, 3 لفريق و3 لفريق.

كل طفل يمسك الحبل من الجهتين والطفل الثالث مهمته نشر الملابس,

مع إعلان البداية يبدأ الأطفال ينشرون الملابس لمدة دقيقة, بعد الدقيقة يتوقف الكل, والطفل الي نشر ملابس أكثر يكون فريقه الفايز.

ممكن لزيادة الصعوبة والحماس تكون عيون الطفل الي ينشر مغمضة بس في هذي الحالة نزود الوقت عن دقيقة.

المسابقة الثالثة: الطلبات..

يمدي في هذي المسابقة تشركون العدد الي تبغون ,2 فما فوق..

مجموعة طلبات تطلبونها من الأطفال, وأسرع طفل يجيبها له نقطة, في النهاية تجمعون النقاط لكل طفل والي عدد نقاطه أكثر هو الفايز.

أمثلة عالطلبات: روج أحمر, شنطة صغيرة زرقاء, كتاب, مسكرا, عطر, وردة, ملعقة, كورة حمراء, فرشة شعر, خاتم ذهب..الخ

من شدة الحماس ممكن الطفل يجيب لكم الشيء من نفسه يعني تعطيك بكلة شعرها أو شباصتها الي على شكل وردة وهكذا …😃

 

الجزء الثاني من التدوينة بتكون مسابقات شفهية, ما تحتاج أدوات أو الواحد يتحرك من مكانه ..وهذي المسابقات ممكن تنلعب كذا مع بعض وقت فضاوة أو للي يبغى يقطع الوقت في السيارة مع أطفاله ..

من الصدف الجميلة إني أخذت بطاقات يومًا ما عشان كمية الصور الي فيها, وطلع محتواها عبارة عن مسابقات وأشياء ممكن الواحد يسويها وهو في رحلة في السيارة أو في الباص أو القطار ..الخ

بأعطيكم 10 أفكار منها :

 

1- طيارة- جناح-طائر.

الفكرة إنه الواحد يبدأ يقول كلمة مثلاً كلمة طيارة, الي بعده يقول كلمة لها علاقة بالطيارة مثلاً جناح, الي بعده يقول كلمة لها علاقة بالجناح مثلاً دجاج, الي بعد يقول كلمة لها علاقة بالدجاج مثلاً بيض, كلمة لها علاقة بالبيض مثلاً فطور ..الخ وهكذا لحد ما أحد يعلّق أو يقول كلمة مكررة خلاص تنعاد اللعبة من جديد.

 

2-تقدر تشوف؟ 

اللعبة هذي كويس تكون في مكان مزدحم ومليان أشياء وناس أو إذا كانت في السيارة تكون السيارة تمشي بشويش..

المهم يتم الاتفاق على وقت اللعبة مثلاً 5 دقائق.

تبدأ اللعبة بإنه يقول الي دوره في اللعب: تقدرون تشوفون رجال لابس قبعة زرقاء؟ أو بنت شايلة شنطة وردية, أو وردة بيضاء أو أو … والبقية يحاولون يكتشفون مكان الشيء الي قاله, أسرع واحد يأشر عالمكان له نقطة..

بعد ما يخلص الأول أسئلته في الوقت المحدد يجي دور الثاني وهكذا لحد ما كل لاعب يكون له جولة يسأل فيها, في النهاية تُحسب النقاط والي له نقاط أكثر هو الفايز.

3-أنا أشوف بعيني الصغيرة ..

فكرتها تشبه اللعبة الي قبل, بس تختلف في إن اللاعب يشوف حاجة “يكون الكل ممكن يشوفها” بعدين يقول :أنا أراقب بعيني الصغيرة شيء يبدأ بحرف ال ..ويقول أول حرف من الشيء الي يشوفه,

البقية يحاولون يكتشفون ايش هذا الشيء..ممكن بدل ما يقول ايش أول حرف من هذا الشيء يقول مثلاً أنا أشوف شيء لونه أزرق, أو شيء له رائحة.. الخ وطبعا الي يلقى الشيء أسرع هو الفايز ويكون دوره هو.

 

4-عشرين سؤال. 

اللاعب يحط في باله شيء, وبقية اللعيبة يبدؤون يسألونه أسئلة عشان يتعرفون على هذا الشيء..

الأسئلة هذي لها شروط كالتالي:

-لازم إجابة السؤال تكون نعم أو لا ..بس !

-الأسئلة كلها ما تتجاوز 20 سؤال فقط يدخل من ضمنها التخمينات, يعني إذا خمّن أحد الشيء يُعتبر سؤال.

-الي يخمن شيء وطلع غلط يطلع من اللعبة, إذا طلع صح يفوز.

-بعد العشرين سؤال إذا ما أحد عرف الإجابة يكون الي حدد الشيء في عقله هو الفايز.

5-الجائع والأبجدية.

اللاعب الأول يقول : أنا جائع, أنا ممكن آكل أناناس.

الثاني يقول: وأنا جائع, ممكن آكل أناناس  و باميا

الثالث يقول :أنا جائع ممكن آكل أناناس وباميا وتفاحة ..

والرابع نفس الشيء ويزود أكلة تبدأ بالحرف التالي لحد ما تخلص الحروف الهجائية.

اللعبة تخلص لما أحد ما يتذكر الترتيب للأشياء أو ما يقدر يجيب كلمة جديدة

ممكن في بعض الحروف صعب الواحد يلقى لها أكلات فمن البداية يُحدد إنه هذي الحروف ما يُشترط يكون الحرف في بداية الكلمة لكن يكون في وسطها أو نهايتها .

 

6-التنين القادم .

هذي اللعبة ظريفة وتعتمد على سرعة البديهة ..

الشخص الأول يقول جملة فيها خبر سيء مثلاً : فيه تنين جاي على جهتنا ! .

الي بعده يقول جملة فيها خبر جيد بالنسبة للخبر السيء مثلاً يقول: بس هذا التنين ما عنده أسنان !

يجي الي بعده يقول جملة فيها خبر سيء مثلاً: لكنه ينفث نار!

الي بعده يقول جملة جيدة زي : بس أنا عندي طفاية حريق.

الي بعده يقول جملة سيئة زي :بس الي عندك ما تشتغل.

ممكن الي بعده يقول :أنا عندي وحدة ثانية أو أنا عندي بدلة ضد الحريق أو فيه مكان للهروب من هذي الجهة .

والي بعده يرد عليه بحاجة سلبية.

وهكذا ممكن الواحد يبدع مو شرط الحكاية كلها تكون متعلقة بالتنين والهروب منه .

اللعبة تنتهي لما محد يلقى شيء يقوله لآخر شخص تكلم

 

7-لعبة القافية.

اللاعب الأول يقول كلمة ممكن يجي على قافيتها كلمات كثيرة زي مثلاً كلمة :ناس

يكتب كل واحد هذي الكلمة في ورقة عنده, ويجي اللاعب الثاني يقول كلمة تنتهي بنفس القافية زي مثلاً : فأس ..

يكتب الكل هذي الكلمة بعدين يجي الثالث نفس الشيء مثلاً : رأس

ألماس, وسواس,أعراس, ساس, بأس

. وطبعًا كل ما أحد يقول كلمة يكتبها الجميع في الورقة عندهم

لحد ما محد يقدر يجي كلمات تنتهي بنفس القافية.بعدها كل واحد يربط هذي الكلمات مع بعض في خاطرة مالها معنى زي مثلاً ممكن أكتب أنا : عند البأس تُستعمل الفأس, والناس في الأعراس يلبسون الألماس من الساس إلى الرأس وقد يأتيهم الوسواس ..

 

8- 30 ثانية 

بما إنا دخلنا في الورق فهذي اللعبة كل واحد يكتب في ورقة صغيرة موضوع ممكن يكون الموضوع :الطعام, أو الرياضة, أو الكتب, أو أي موضوع يخطر في البال..

يمررون الأوراق لبعض, وكل واحد لما يجي دوره يفتح الورقة الي جته ويقرأ الموضوع الي فيها ويتكلم عنه بتواصل بدون انقطاع لمدة 30 ثانية, بدون ما يقول آآآآ أو مممم أو يعيد في الكلام أو أي شيء من هذا القبيل.

الفائز طبعًا الي يقدر يكمل كلام عن الموضوع لحد نهاية الثلاثين ثانية .

إذا أحد حس إن الشخص الي يتكلم توقف كثير أو عاد الكلام ممكن يوقفه ويُتحدى بإنه هو يكمل الكلام عنه.

9-أوجد كلمة .

يبدأ اللاعب الأول بإنه يقول كلمة طويلة مثلاً كلمة :خضروات

يكتب كل واحد هذي الكلمة, بعدين خلال ثلاث دقائق يكتبون قائمة بكلمات تتكون من حروف هذي الكلمة الطويلة..شرط إن كل كلمة تكون أكثر من حرفين وما يُستعمل الحرف إلا مرة وحدة ” إلا إذا كان أصلا مكرر في نفس الكلمة ممكن يُستعمل على عدد التكرار مثلاً كلمة أناناس حرف الألف مكرر فيها 3 مرات فممكن نجيب كلمات مكرر فيها حرف الألف”

مثلاً من خضروات ممكن نكتب :

خضار, اخضر, تراض, ارض, ضرات, تضار, الخ

بعد نهاية الوقت يشوف كل واحد كم جاب كلمة من حروف الكلمة الأصلية, الكلمة الي 3 حروف تُحسب 3 نقاط, والي 4 تُحسب 4 نقاط وهكذا..والشخص الي عنده نقاط أكثر هو الفايز.

9-لعبة الأسماء.

كل واحد يكتب في ورقة صغيرة اسم شخص معروف للجميع. ممكن يكون شخص مشهور أو شخص الكل يعرفه المهم. يتبادل الجميع الأوراق, وكل واحد ياخذ ورقته وبدون ما يشوف الاسم الي فيها يفتحها ويلعق الجانب الي مو مكتوب فيه شيء منها بعدين يضغط عليها في جبهته فتصير المعلقة معلقة في جبهته والكل يقدر يشوف الاسم ما عداه هو..

تبدأ اللعبة بإن كل واحد يسأل سؤال بحيث الإجابة تكون نعم أو لا, والسؤال هذا تخليه يعرف الشخص الي مكتوب على جبهته, ممكن يسأل :هل هو مشهور؟ إذا جاوبوه ب نعم فيمديه يسأل سؤال ثاني, إذا جاوبوه بلا..يصير دور الي بعده يسأل.

الفائز بيكون أول واحد يجيب اسم الشخص الي مكتوب عنده .

 

10 -لعبة القصة.

أول لاعب يقول جملة تكون بداية القصة, ومن بعدها كل واحد ياخذ دوره يكمل هذي القصة بجملة ثانية, يعني مثلاً أول لاعب يقول: في يوم من الأيام كان هناك فتاة صغيرة ويوقف, الي بعده يكمل الجملة مثلاً :كانت ترتدي معطفًا أحمر..والي بعده وهكذا لحد ما تخلص القصة .

 

وبكذا خلصت الأفكار هنا, إن شاء الله تكون أفكار مفيدة وفعالة وممتعة بالنسبة لكم, شكرًا لوقتكم الثمين يا جميلين 🌷

Posted by:molarya

.ig-b- { display: inline-block; } .ig-b- img { visibility: hidden; } .ig-b-:hover { background-position: 0 -60px; } .ig-b-:active { background-position: 0

رأيان حول “مسابقات منوّعة

  1. اش ذا الله تفوز بألطف تدوية الله يسعدك ماشاللله …
    فعلا تحمست العبها وخصوصا لعبة جناح -طائر مره تحفز الذاكرة وخصوصا لو كانوا اطفال روضة او اول ابتدائي جدا نبسطت فيها الله يسعدك يارب.

اترك تعليقًا على Joharh World إلغاء الرد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s