خلطة طبيعية للشعر

 

 

مرحبًا جميعًا,

“التدوينات ورا بعض لأن اليوم آخر يوم في التحدي 🙃”

بأتكلم لكم الحين بشكل سريع عن خلطة الشعر الي سويتها, وناسبتني الحمد لله ..تقدرون تقولون هذي التدوينة تعتبر جزء ثاني لهذي عنايتي الشخصية ! ومتخصصة في الشعر..

التدوينة هذي بأحدثها إن شاء الله يومًا ما بإضافة شيء متحمسة أجربه, لكن لسا ما تيسر لي استعماله, فمتى ما تيسر لي وحسيت بفايدة إن شاء الله بأحدثها ..

 

نجي للخلطة الحالية:

هي تنفع للناس الي ودهم ياخذون فوايد الحنا بس بدون حوسته, غير إن ريحتها وهي على راسك جمييلة ..

مكوناتها :

زيت جوز الهند

جل الصبار

زيت اللافندر

وآخر شيء حناء

 

أخذت زيت جوز الهند, ذوبته على حمام ماء, بعدين خليته يتماسك مرة ثانية, بعدين خفقته بخلاط الدريم ويب لحد ما صار كريمي, “مو لازم خطوة الخفق بس أنا أحب قوامه وشكله كذا غير إنه ما يصير جامد وصعب إذا انحفظ في التلاجة”

هنا يجي وقت الإضافات ..

أضفت زيت اللافندر حول 15 نقطة , وجل الصبار, وحوالي ملعقتين طعام حنا ..ودمجتهم كويس وتراا خلصت الخلطة ..😍

حفظتها في ميسون جار في التلاجة, ممكن تنحفظ برا التلاجة إذا الجو بارد, بس أنا أفضل أحفظها في التلاجة ..

نحط منها عالشعر ونحط غطا الراس عليها, ونخليها فترة حول ساعة وممكن أكثر بعدين نشيل غطا الراس عشان تنشف الحنا, ونغسل شعرنا..

زيت جوز الهند وجل الصبار والحنا كلها مفيدة للشعر, خاصة إذا خلطتي الحنا مع زيت جوز الهند يساعد على امتصاص فوائده حسب ما قرأت ..ممكن تحطون زيت شجر الشاي بعد لأنه مفيد لفروة الرأس, وزيت اللافندر يعطي رائحة عطرية لطيفة .

 

ألقاكم على خير بإذن الله .