تجربتي مع Pre-sessional English course في مدينة شيفيلد

السلام عليكم ورحمة الله وبركاته

 

تنويه: التدوينة مليانة شوي, إذا كنتِ فاضية كويس, كمليها! إذا لا انتظري ع بال ما تفضين

قبل أسبوعين وحولها تقريبًا, أنهيت بفضل الله مرحلة Pre-sessional English course في معهد ELTC التابع لجامعة شيفيلد, وشعرتُ أني أرغبُ جدًا بكتابة تجربتي هنا, أولًا لتوثيق ذكريات هذه المرحلة من حياتي, ثانيًا لعلّ أحدًا ما يستفيدُ منها, قبل أن أبدأ أحبّ أن أنوّه على أمرٍ بديهيّ, وهو أنّه قد يجرّب شخصين الأمر نفسه لكن نتائج التجربة تختلف تمامًا, مما يعني أن تجربتي هذه ليست حكمًا أو أمرًا قاطعًا, أنظمة المعهد قد تتغير, برنامج اللغة نفسه قد يكون مختلفًا حسب السنة التي تقرأ/ين فيها هذه التدوينة, لكن على كلّ حال قد تجد/ين شيئًا مفيدًا في هذه التدوينة ..

 

محاور التدوينة ستكون كالتالي:

-التسجيل.

-تجربة الكورس مع الحمل.

-نظرة عامة للكورس و تجربة الSummer school .

-نتائج الاختبار والريسيت.

-آراء وتجارب بعض الصديقات .

التسجيل:

بالنسبة للتسجيل في البرنامج فلم أسجل بنفسي فيه, لأنّ أخي حفظه الله ساعدني في ذلك,

لكنّ الأمر بشكل مختصر هو أنّه عليك الدخول لصفحة المعهد الرئيسية معهد eltc ومن ثمّ اختيار الكورس المرغوب وإكمال التطبيق وللدخول لبرنامج البريسشنال خاصة أظن أن درجة الآيلتس المطلوبة 5.5 لا أدري إذا يُقبل بأقل منها, من الممكن أيضًا الاستعانة بالمكاتب المجانية التي تقدّم على الجامعات والمعاهد, وأذكر بناء على تجربتي مكتب ياس أكاديمي

 

ممكن تراسلونه عبر أي وسيلة, وهو يقدم لكم على المعهد المنشود, ويخبركم ايش ناقص وايش يحتاج لإتمام التسجيل,الخدمة مجانية كما ذكرت سابقًا.

من الاشياء التي واجهتني في فترة التسجيل, هو طلب المعهد للضمان المالي, وطلب الملحقية القبول قبل إصدار الضمان المالي !

كان الحل أنني راسلت المعهد, وأعطيتهم الضمان العام, وأخبرتهم أن الداعم my sponsor سوف يدفع الضمان المالي للفصل الدراسي إذا أعطيته القبول .

the Fee Breakdown letter

هذا كان نص الرسالة الي أرسلتها لهم .

In order to obtain a new Financial Grantee, my sponsor would required the Fee Breakdown letter in advance from the institution which is providing the service, in this case the ELTC. It will help me a lot if you can provide me a conditional acceptance letter to give to my sponsor, hence to get an up to date letter to cover the expenses.

والحمد لله بعد عدّة مراسلات وبعد روحة وجيّة لمبناهم تفهموا الموضوع, فهمت إن هذي المشكلة صارت أكثر من مرة فما فيها قلق إن شاء الله المعهد لازم يتفهم في النهاية ويعطي البريك داون ليتر !

نقطة مفيدة وهي إنه الايميلات مفيدة لتوثيق المعاملات, والمكالمات الهاتفية أسرع من الإيميلات, لكن أسرع وأفضل شيء هو لو كنت في نفس البلد تروحين للمعهد عند الريسبشن حقه وتخلصين أمورك من عندهم عشان يعرفون قد ايش أنت جادة ومهتمة.

نقطة أخيرة حابة أوضحها إنه عادة الدراسة تبدأ من سبتمبر, ومدتها كاملة 4 أترام, الترم الأول من سبتمبر لديسمبر..

والترم الثاني من يناير لأبريل, والترم الثالث من أواخر أبريل ليونيو , و الترم الرابع من أواخر يونيو لأوغست. بالنسبة لي أنا بدأت من الترم الثاني الي هو من يناير وكملت لحد الترم الرابع الي هو لنهاية اوغست.

بالنسبة إذا جيتي تسجلين الطلب في الملحقية, المعهد اسمه university of sheffield ما بتلقينه باسمه الصريح .

تجربة الكورس مع الحمل : 

من الأشياء الي لازم تنبهين عليها وقت التسجيل إذا إنك حامل, بالنسبة لي لما خبرتهم جتني وحدة قبل إكمال إجراءات التسجيل, وأعطتني كذا خطة, إني أبدأ من الحين بس آخذ الكورس 3 أترام بدل ترمين عشان أعوض الغياب الي بأغيبه فترة الولادة

أو أبدأ بعد الولادة يعني يصير آخذ ترمين, أو أؤجل الدراسة كلها وأبدأ بعد سنة ..

بالنسبة لي اخترت إني أدرس الثلاث أترام, فبالتالي بعد فترة من بداية الدراسة, سووا لي موعد ثاني مع مكتب الwelfare , المهم الموعد كان عبارة عن خطة الحمل, ايش ممكن يسوون لي هذي الفترة, ايش الوضع بالنسبة لي إذا فيه حالات طارئة, ايش الخطة في حال حصلت ولادة مبكرة, وايش الوضع بعد الولادة. كلها جلست معها وعبينا الأوراق, وخبرتني إنه في وضعي هذا عندي أريحية ومرونة حتى لو جيت متأخر, أو لو تعبت وقت الكلاس واحتجت أطلع أمشي شوية, وحتى بعد الولادة ممكن اذا احتجت اخذ بريك للرضاعة وأحد يجيب لي النونو مثلاً عشان أرضعه.. باختصار حسيت إنهم جدًا يهتمون بوضع الحامل, من ضمن الأشياء الدورية الي يسويها المعهد غالبًا نهاية كل ترم إنه يطلب منا نسجل في اختبار الآيلتس, فبالنسبة لي لما سجلت وكانوا عارفين بوضعي فأمّنوا لي غرفة خاصة لوحدي أسوي فيها الاختبار.

بالنسبة لبعد الولادة, فلأنها كانت أصلاً في فترة إجازة بين ترمين مدتها ثلاث أسابيع كان شيء كويس بالنسبة لي, والوضع كان مرن بالنسبة للحضور بعدها, الترم الثالث كان مدته 6 أسابيع, وكان في رمضان, حضرت أيام منه لكن صعب عليّ كثير في النهاية, فقررت إني آخذ إجازة لما بقي منه أسبوعين وأسافر السعودية. رحت عندهم وخبرتهم بالوضع وإني مسافرة ونفس الشيء جتني وحده من الويلفير وناقشتني واقترحت علي إني أكتب السبب الوضع الجديد مع النونو وإنه ممكن المديرة توافق يكون هذا غياب بعذر لأنه غالبًا أي شيء فيه أطفال يتفهمونه جدًا, وخبرتني في نفس الوقت, إن آخر ترم الي هو summer school لازم أهيء وضعي تمامًا لأن الترم جدًا مركز وحتى نسبة الغياب مهمة جدًا فيه والا ممكن ما أعدي ..

 

نظرة عامة على الكورس:

زي ما قلت قبل

 عادة الدراسة تبدأ من سبتمبر, ومدتها كاملة 4 أترام, الترم الأول من سبتمبر لديسمبر..والترم الثاني من يناير لأبريل, والترم الثالث من أواخر أبريل ليونيو , و الترم الرابع من أواخر يونيو لأوغست. بالنسبة لي أنا بدأت من الترم الثاني الي هو من يناير وكملت لحد الترم الرابع الي هو لنهاية اوغست.

الترم الثاني الي أنا بدأت فيه دخلت فيه بدرجة ايلتس 5.5 , في البداية سووا اختبار تحديد مستوى, كأنه ايلتس مصغّر, وعلى أساسه قسّموا الفصول, كل فصل له مدرستين, وحدة أساسية مختصة بمهارة الكتابة والقراءة, والثانية مُساعِدة مختصة بمهارة المحادثة والاستماع. وفيه مادة اختيارية مع مدرس ثالث تكون يا ielts skills  أو grammar أو vocabulary

والمهام في هذا الترم عبارة عن كتابة 1500 كلمة بحث عن موضوع معيّن نختاره من عدّة مواضيع هم يعطونا اياها + 3 سيمنارات

بشكل عام الدوام 5 أيام يبدأ من 9 وربع وينتهي 3 وربع, عدا يوم الجمعة ينتهي حوالي 12:45 دقيقة

وفيه بريك مدته نص ساعة, وبريك ثاني مدته ساعة خلال فترة الدوام.

بالنسبة لي درست عند ليندا وكاثرين,

ليندا إنسانة تحبّ القطط , نباتية, ما تاكل شوكلاتة أبدًا, مثقفة ومطلعة وتحب تقرأ بشكل كبير, عليها شطحات تضحكني مرة , هي الي كانت مسؤلة عن تقييم الكتابة, و مهي متساهلة أبدًا في هذا الموضوع, تعليقاتها على خطة الكتابة مفيدة جدًا وممكن تفتح لك آفاق إنه عن ايش تكتبين. يبقى إنه على نص الترم كذا بدأت تسألنا ايش تبغون أعلمكم, حسيت إنه ما عندهم شيء معين يعطونا إياه, فمرّة شيء كويس لو يكون في بالكم حاجة حابين تطورونها عشان تطلبون منهم يسوونها..

مثلاً تدريب أكثر على استعمال الكلمات, أو تدريب أكثر على الكتابة, أو القواعد أو المحادثة, أي شيء ممكن يخطر على بالكم ..

عامّة الأنشطة الي كنا نسويها وقت الكلاس, كتابة مؤقتة, قراءة بحث وتحليله وفهمه, نحل مسائل على القواعد ..نلعب ألعاب تثبّت الكلمات ..أحيانًا كانت تخلينا نختار موضوع و تشغل لنا فيديو وثائقي عنه طوال الحصة, وممكن توقف الفيديو بين فترة وفترة وتسألنا أسئلة ..طبعًا كانت تعطينا وقت زيادة على النهاية بالذات عشان نخطط ونرتب ونكتب المهمة حقتنا “1500” كلمة عن موضوع معيّن يحددونه لنا.

كاثي إنسانة مؤمنة جدًا بالاحتباس الحراري, حركية ونشيطة وقت الفصل, تتكلم كثير وحتى هي تقول هذا الشيء عن نفسها بس ما كان مشكلة بالنسبة لي بالعكس كنت أستمتع,الأنشطة الي كنا نسويها إنه تشغل لنا محاضرة ونكتب ملاحظات عليها, تدربنا على نطق الكلمات, وأهم شيء السيمنار كان عبارة عن عدة مواضيع نختار منها موضوع واحد, ونحدد قائد أو اثنين للمجموعة “كل مجموعة فيها حوالي 5 أشخاص” مهمة القائد يجيب بحث أو اثنين متعلقة بهذا الموضوع, ويكتب 5 أسئلة ويرسلها لمجموعته, في وقت السيمنار نبدأ النقاش ونجاوب على الأسئلة من البحث وممكن نضيف أشياء من تجاربنا “كنا نضيف كثير من تجاربنا الصدق” الفكرة إن النقاش يستمر ويكون بشكل أكاديمي ويكون فيه ناس معارضين للموضوع وناس مؤيدين, وبالتالي نتدرب مو بس على الإجابة, بل حتى على آداب المقاطعة, أو لو حاب/ة تعرضين رأي مختلف عن الي تسمعينه, أو لما تؤيد/ين رأي ما وهكذا. طبعًا تكونين كاتبة ملاحظاتك في ورقة, تاخذها الأستاذة في نهاية النقاش وتقيّم عليها, ضروري ما تكتب/ين حرفيًا ايش بتقولين لأن هذا ممكن ينقصك لأنك راح يكون واضح عليك إنه حافظ/ة الكلام مو قاعدة تناقشين بأسلوب طبيعي وعفوي..

نقطة بس حابة أذكرها لأني مريت فيها في أول سيمنار, الي سويته وقت الإعداد إني توقعت إنه رح يكون النقاش عبارة عن إني أنا مثلاً أبدأ وأقول كلل الي عندي, بعدين الي بعدي وهكذا..فكتبت ملاحظاتي على هذا الأساس..

فالبتالي وقت السيمنار الحقيقي كانت الفكرة إنه نجاوب على أسئلة, فتهت لأني ما أدري فين كتبت الملاحظة الي تتعلق بإجابة هذا السؤال!, فالأفضل وقت الإعداد تكتب/ين السؤال في الصفحة الأولى, وتحطين تحته كل النقاط الي حابة تذكرينها بشأنه.بعدين الصفحة الثانية السؤال الثاني وهكذا..

الترم الثالث كانت مهامه عبارة عن كتابة 2000 كلمة عن موضوع له علاقة بتخصص الجامعة  وعرض بوربوينت عن نفس موضوعك , بدون سيمنارات, مدته 6 أسابيع, ولأنه كان الترم الي بعد ولادتي فاعتذرت عن كثير أيام فيه وغبت عن آخره بدون تسليم المهام والحمد لله قبلوا العذر ..

بالنسبة لوقت الرجعة للترم الرابع summer school تأخرت فيزة بنتي, فراسلت المعهد وقالوا  لو غبتي أكثر من أسبوع راح نضطر نلغي تسجيلك, وبالتالي عندك حلين : يا تختبرين ايلتس وتجيبين درجة تؤهلك انه تجين على اخر 6 اسابع “لأن السمر كورس كان يا إنه تدخلين 10 أسابيع, أو 6 أسابيع, أو 4 أسابيع..وحق ال6 أسابيع يتطلب منك تجيبين درجة 6 في الايلتس” أو الحل الثاني إنه خلاص أؤجل الدراسة وأدرس السنة الي بعدها !

والحمد تيسرت الفيزا بعد أسبوع.

طبيعة ال summer school تختلف عن بقية الأترام.. بداية الطلاب مقسمين في مباني الجامعة مو في مبنى المعهد نفسه, حسب تخصصاتهم, وأنا بما إني تأخرت أسبوع فحطوني في فصل كل الي فيه تأخروا أسبوع لنفس الظرف” مشاكل الفيزا” ..

الجنسية السائدة في هذا الكورس هم الصينيين ..هيؤوا نفسكم إنهم رح يخلونكم تدخلون معهم في قروب للكلاس في برنامج التواصل حقهم الي هو wee chat

الدوام هنا عامة يبدأ من 9:15 وينتهي الساعة 2:45 كل يوم .

فيه بريك واحد مدته ساعتين تقريبًا. خلال هذا البريك يعطونك مهام تسوينها, ودروس أونلاين تتابعينها

المهام الأساسية عبارة عن كتابة وسيمنار وعرض

الكتابة هذي السنة كانت 1500 كلمة عن سؤال هم يعطونك اياه ويطلبون إنك تجاوبينه .

السيمنار كان كل أسبوع يعرضون محاضرة نسمعها في وقت البريك ونكتب ملاحظات عليها وكم سؤال وبعدها في وقت الحصة يقسمونا مجاميع نتناقش عليها ونسأل أسئلتنا, والمدرسة تدور وتسمع وتشيّك على الأسئلة.

العرض كان كل أسبوع فيه نسوي عرض طبعًا موضوعه يختلف, مرة كانوا يركزون على كيفية عرضنا للأرقام والبيانات, ومرة على لغة الجسد, ومرة على لغة المقارنة وهكذا..

العرض النهائي الي عليه التقييم النهائي راح يخلونك مجموعة من 2 أو 3 مع ناس من نفس تخصصك ..أو ممكن زي في حالتي عرضت لوحدي لأن ما كان معي أحد في نفس التخصص.

كل أسبوع كان فيه شيء اسمهactive reading فكرته إنه نقرأ مقال بس بشكل إنه أنت مثلا تركزين على البيانات والصور في المقال, غيرك من المجموعة يركز على الأفكار الرئيسية وتلخيص المقال, غيره يركز على اقتباسات مهمة وربط المقال بتجارب الحياة وغيره يكون المدير للمجموعة فيكتب أسئلة بحيث إنه يدير النقاش

*فيه نقطة حابة أتكلم عنها تختص السيمنار, أنتم ممكن تلاحظون بين فترة وفترة المعهد يسوي أشياء مستفزة ما أدري ايش هدفهم منها ..وحدة من هذي الأشياء إنه عرض في أسبوع من الأسابيع محاضرة عشان نتناقش عليها, وكان الكلام عن العلماء, وفجأة شطح المُحاضر للمثلية والناس المثليين وإنه لحسن الحظ بريطانيا صارت تعترف فيهم وإنه هذا الشيء طبيعي جدًا ومن الفطرة لأن فيه حيوانات تسوي كذا !!

بالنسبة لي وقت النقاش ما قدرت أبدًا أسكت, فتبنيت وجهة النظر المُعارضة لكلام هذا المُحاضر, وكان كلامي يدور على إنه أدلته مو مقنعة بفطرية هذا الشيء, وإنه ما دام استدل بالحيوانات على صحة هذا الأمر فهذا زي الي يعني إنه علينا إنا نتصرف زي الحيوانات!!

وكأني بكلامي هذا لمست وتر حساس جدًا عند الأستاذة ” شوية بأجيكم بشخصيتها” في نهاية النقاش تحول السيمنار منا احنا كمجموعة إلى سيمنار بيني وبينها, كانت جدًا معصبة, وتقول أبدًا مو من حقك تتكلمين بهذا الشكل, سألتها, إذا كنت معارضة طيب لفكرة المثلية فكيف أعرض رأيي بشكل لطيف, خاصة إن السيمنار فكرته ناس مؤيدة وناس مُعارضة, فكان ردها إنه لا تعرضين رأيك, بالعكس غيريه !..

أخلاقها كانت غير أكاديمية حقيقة, لكن النقطة الي أبغى أوصلها للجميع إن النقطة هذي حساسة جدًا عندهم, فإذا تبغي/ن تريح/ين راسك وتسلم/ين من ردات فعلهم الي ما تعرفين لأي درجة ممكن توصل تجنبي الخوض فيها, وإن كان ولابد كما في حالتي كانت أغلب الأسئلة عنها, فاعرضي رأيك بشكل عام, إنه الدين حقك والثقافة حقت بلدك ترفض هذا الشيء, لكن هم ناس لهم حقوق واحترام ومرة كويسين الله يخسهم ولا يبلانا ما بلاهم >انتبهوا لا تقولون الي باللون الأخضر !  ممكن تجيبيون إن الي انولدوا فعلا بهذا الشكل “خنثى” لهم أحكام متعلقة بهم والإسلام اهتم بهم .

وإن شاء الله يكون هذا التصرف الأصح..الله يكفينا شرهم دائمًا وأبدًا يا رب.

بالنسبة للي درسوني هذا الترم كانوا مدرسين مختلفين عن بقية الأترام..

جيما : درستني الكتابة والقراءة, هي أساسًا تدرس انجليزي جينرال “عام” ما تدرس انجليزي أكاديمي..

فتحسون إنها مضيعة الطاسة شوية, مستواها لا يُقارن بتاتًا بمستوى ليندا, لكنها طيبة, تحبّ الفلة وأهم شيء عندها إنكم تستمتعون بالويكيند وتكونون سعداء ..ممكن تفيدكم من ناحية تصحيح القواعد والكلمات لكنها ما رح تفيدكم أبدًا بأفكار للكتابة أو إذا منتوا فاهمين السؤال حق الكتابة هي ما رح تكون فاهمته لأنه مو في تخصصها, فلازم تتعبون شوية لحد ما تفهمون السؤال بنفسكم, باختصار ممكن تكون ممتازة لتدريس الجينرال لكن مو مجالها تدرس انجليزي أكاديمي .

جمايما:هذي الي درستني مهارة الاستماع والمحادثة..مستواها كمدرسة لكورس أكاديمي كويس, تسوي أنشطة ممتعة جدًا, إنسانة حساااسة تجاه مواضيع معينة وما تقدر تخبي انفعالاتها أبدًا, حساسيتها أكثر شيء تجاه الحريم: لحد يقول قدامها إن الرجال أقوى من الحريم يمكن تطق, وتجاه حقوق الإنسان “ومن ضمنهم المثليين” بشكل عام, لحد يقول إن أحد أحسن من أحد لأنها يمكن تطق بعد, مهتمة جدًا بالاحتباس الحراري وقضيته وتحسونها وقت التقييم للمهام تحلل من قلب .

 

أحس إني طولت هنا فبأنتقل للنقطة الي بعدها ..

نتائج الاختبار والريسيت:

طلعت نتائج الاختبار في آخر يوم من الكورس, ومن قدر الله كان عندي ريسيت “إعادة اختبار” في مهارة الكتابة,  استغربت كثير من هذي النتيجة, ولما ناقشت المعلمة في نفس اليوم كان العذر إني ما جاوبت السؤال بشكل صحيح! بمعنى كتابتي جيدة ومستواها كويس لكن السؤال ما انحلّ ! , لما سألتها ايش الإجابة الصحيحة قالت ما أعرف !, لكن فيه ثلاثة صححوا معي ووافقوا إنك ما حليتي صح !

لما قلت طيب هذول الثلاثة ايش الإجابة الي عندهم؟ , (كنت من جدي اسأل ومن جدي أبغى أعرف, لأني تعبت على ما فهمت السؤال “أو توقعت إني فهمته” وبالتالي جاوبته بشكل شفته منطقي ويتلائم مع السؤال)..كانت إجابتها نفس الشيء ما أعرف !

فهمت بعدين إنهم يرفضون أي نقاش في الموضوع, وإنه مدام قالوا سوي ريسيت معناه لازم تسوي ريسيت والا ما رح يخلونك تعدين !

كان فيه وحدة أعرفها الله يجزاها خير تبرعت وقرأت كتابتي, وشرحت لي إن الكتابة جيدة لكني فهمت السؤال غلط ..وشرحت لي السؤال, حقيقي تحسفت كثير إني ما سألت كثير وزنيت على الأستاذة عشان تشرح لي السؤال لأنه كان شيء من واجبها تبحث وتفهم وتشرح لك ..

الحمد لله على كل حال, اختبار الإعادة كان عبارة عن مقالتين يعطونا اياها نقرأها, ونسوي مقارنة بينهم في 500 كلمة خلال 3 ساعات..ذاكرت من دروس الاونلاين الي كان المعهد ينزلها لنا, وذاكرت من academic phrase bank وشفت أمثلة على قطع تشابه هذا السؤال ..

المقالين كان كل واحد في صفحة وحدة اي فور, وكانت مستواه تحدي صراحة,3 ساعات بالنسبة لي مرّت بسرعة على بال ما أفهم المقالتين,وعلى بال ما أسوي خطة, وأبدأ أكتب وأعدل وو, كان فيه كثير كلمات أكاديمية وغالبًا ما يفهمها إلا شخص عنده خلفية أكاديمية واسعة, كتبت الي عندي وكثّرت من (وجعلنا من بين أيديهم سدًا ومن خلفهم سدًّا فأغشيناهم فهم لا يبصرون)

بفضل الله ورحمته, ثم دعوات الأهل والأحباب يسّر لي ربي وعدّيت الحمد لله وأنا الآن على مشارف دراسة جديدة, دعواتكم بالتسديد والتيسير والتوفيق يا رب .

 

آخر شيء حابة أضيف آراء بعض الأصدقاء اللطيفين عن هذا الكورس ..فيه ناس درسوا الكورس كامل من سبتمبر وفيه ناس درسوا فقط ال سمر سكول:

 

ضُحى : 

مميزات وعيوب البريسشنال كورس👍🏻👎🏻

*مميزاته:*

١. يعلمك كيف طريقة الكتابة الصحيحة المناسبه للجامعة الي راح تلتحقي فيها

٢. يعلمك كيف تسوي برزنتيشن وايش هيا التعليمات الي تتبيعيها لمن تسوي السلايدات

٣. يعلمك كيف تحضري للسيمينار و كيف تقدري تطرحي رأيك بطريقة مناسبه وكيف تناقشي وايش هيا الجمل الي ممكن تستخدميها اثناء المناقشه

٤. اختبار ايلتس فري كل ترم

٥. رحلات مجانية

*العيوب:*

١. يكفي اول ترمين او السمر كورس لحاله تاخديه لانه يجمع بين الاترام السابقه بس راح تشدي حيلك لانه فتره قليله ولازم تتعلمي كل شي عشان تضمني النجاح

وفي الاخير كل كلاس يعتمد على الي يدرس في بعض المعلمين والمعلمات شاطرين وممتازين وبعضهم ماعندهم ما عند جدتهم فمستوى الطالب يفرق من كلاس لكلاس ولا المادة هيا نفسها تنعطى لكل الكلاسات 😊

---

 

رشا:

بالنسبة ليه أشوف إني في البريسشنال ما درست إلا في الترمين الاولى كان مفيد فعلا خصوصا الثاني حسيت فرق بمستواي بالكتابه و استركرشر الجمل و تعقيدها

بالنسبه للسبيكنق اتوقع هو الأضعف مهاره في البريسشنال مافي تركيز عليه ,في الترم الثاني بسبب السيمنارات يكون فيه بركتس كثير

عموما اتوقع ترمين تكفي بريسشنال والاهم انك تعرفي نظام المعهد والجامعه فيه لانه هنا ما يعترفوا بنتيجه اي بريسشنال الا اذا كان الصفي فا لازم ترتبي وضعك قبل اختيار مده دراسه البريسشنال لاني اشوف اختبار الايلتس مع البريسشنال مررره مربك و يضيع الهدف من البريسشنال.

---

 

غدير:

الكورس رائع ومفيد وبنفس الوقت خفيف مافيه ضغط لأنه يعتمد على كلاسات اون لاين

من تجربتي كلاسات اون لاين جدا مفيده أقترح يكون معاك دفتر أثناء متابعتها لتسجيل الملاحظات المهمه او أخذ صوره بالجوال لبعض الأمثله لأنها تتكرر في أسئلة الكوز نهاية كل اسبوع

أهم نصيحه بالنسبة لي الإلتزام بالحضور وان شاء الله الكورس سهل والكل يقدر يجتازه وبالتوفيق

---

 

أروى :

من وجهة نظري، الكورس كان لطيف وخفيف ومفيد في نقطتين: الكتابة بمفردات اكاديمية وفي العروض التقديمية. بس اهم شيء أنه الطالب يجتهد. أهم نصيحتين:

١. لاتضيع اوقات البريك واستغلها في عمل الواجبات وفي التطوير الذاتي.

٢. استفد من النصائح والفيدباك الموجهة لك من المدرس ولاتأخذها شيء شخصي.

---

 

أثير :

أنا من وجهة نظري أهم شي يكون التركيز على الرايتنق وفي الفيرست درافت تسلم أكثر جزئية تقدر عليها عشان يعطوها تعديلات وتعدل من بدري وما تنضغط في الوقت اذا حابة تجيب درجة حلوة.

 

---

 

عهود :

الكورس جدا مفيد وهو بالضبط مثل العدّة الي تاخذيها معاك للماجستير ، المعلومات متخصصه بالتقييم المطلوب منك للدراسات العليا مثل الكتابه الأكاديمية و العرض و حلقات النقاش و الأجمل ان هذا كله يتم تدريبك عليه بناء على تخصصك (الموضوع الي يطلب منك تسليمه نهاية الكورس يكون من اختيار القسم الي قدمتي للدراسه فيه مثلا تسويق او تعليم او هندسه)

وهذا يكسبك خبره و مرجع اذا احتجتي فالماجستير لمعرفه الطريقه المتبعة خصوصا الكتابه الاكاديميه الي عليها ٦٠٪؜ من تقييمك و نجاحك فالكورس

نصيحه ايضا تحتفظي بالمادة العلميه المقدمة لك اونلاين او تكتبيها بدفتر خاص لاستخدامها لاحقا

---

آخر شيء حابة أعطيكم تدوينة مفيدة جدًا أيضًا تخصّ هذا الموضوع للطيفة دلال :

سلسلة رحلة الإبتعاث إلى المملكة المتحدة : ( كيفية التقديم على الجامعات ؟ )

---

 

وبكذا أكون خلصت تدوينتي هذي, الله ينفع بها وينفعني بها

شكرًا كثيرًا لكلّ من ساهمت معي في كتابة رأيها وتجربتها عن هذا الكورس

أتمنى التوفيق للجميع والله يرفع بنا عز بلادنا وإسلامنا يا كريم .