حلا الجزر المبشور وجوز الهند

بسم الله الرحمن الرحيم .

الحمد لله والصلاة والسلام على رسول الله 

تدوينة سريعة لها عدة مناسبات 

1- من زمان ما كتبت تدوينة .

2- اشتركت مع نافذة مدونات ولأني سعيدة بهذا الأمر فها أنا أحتفل معكم . 

3- والدي الحبيب حفظه الله لنا وأطال لنا في عمره كان يريد عصير جزر.

4-أعددت العصير بالعصارة, مع أني أفضّل السموذي لاحتوائه على الألياف لكن عاد, صدقًا قوام عصير الجزر أفضل من قوام سموذي الجزر, مع إني ما قد جربت سموذي الجزر بس إحساس. هل فيه سموذي جزر ؟ 

5-المهم تعرفون الي يبقى بعد عصر الجزرات ؟ الي كأنه جزر مبشور مررررة ؟ عرفتموه ؟ بقى ! 

6- طبيعة أمل الي تحب إعادة التدوير + عدم الخسرفة بالأكل فكرت في عدة أفكار . 

7- ألوان الجزر تتناسب مع ألوان الخريف القادم . 

 

يالله نبدأ التدوينة ! 

لما اكتشفت إن فيه ناس يرمون كمية الجزر المفروم الي تطلع بعد عصر الجزر, حسيت إنه لازم نلقى شيء يتصلح فيه, أولاً لأنه نظيف, ثانيًا يبقى فيه شوية عصارة, ثالثًا كميته أحس حرام تنرمي ! 

لفتة صغيرة : هل يجيكم تخيل زيي أثناء إعداد أو شرب عصير ما إنه احنا قاعدين نشرب العصير الخلوي حق النبتة هذي, يعني قاعدين نشرب دمها ؟! ترضونها لأنفسكم ؟ عشان كذا اشربوا سموذي أحسن .

فالمهم, فيه عدة أفكار لهذا الجزر المبشور وهي كالتالي : 

1- ممكن نضيفه مباشرة على سلطة طازجة, السلطة ممكن ينحط فيها أي شيء خيار خس جرجير طماط جزر نعناع والجزر, وبما إنا جينا لسيرة السلطة  فالسر في السلطة بالنسبة لي هذا الصوص الأليم :

ليمون  “حسب ما تحبون درجته أنا أحط ليمونتين”

دبس الرمان ملعقة طعام وحدة لا تكثرون عنها  “حتى لو تحبونه كثير” 

وزيت زيتون ملعقة وحدة عشان سعراته كثيرة والا وازنوا سعراته,

وملح ” 

وبالعافية . 

 

2- ممكن تحطونه على لحم أو دجاج مفروم للفطاير أو السمبوسات أو المكرونة .

3- ممكن تسوون رز بالجزر, لما تشوحون البصل تشوحون الجزر هذا معاه تخلونه ع جنب, لما يخلص رزكم تخلطون الجزر معاه ويصير يا سلام!

4-ممكن تحطون منه ع عصير الجزر الي سويتوه, أتوقع إن هذا بيقوي فائدته الغذائية, ويصير سموذي بدل عصير ! 

5-ممكن تسوونه كومبست !, الكومبست بشكل عام يتصلح من بقايا الطعام وأوراق الشجر الذابلة والتربة في وعاء خاص, بعد فترة لما تحلل الفطريات هذي المواد ” ما رح يكون في ريحة حسب ما فهمت لأن الوعاء خاص” يصير عندنا الكومبست الي نخلطه مع التربة فيمليها مواد غذائية وتصير تربة خصبة .

اضغطوا ع كلمة كومبست عشان تعرفون أكثر عنه

6- ممكن تسوون فيه حلا الجزر المبشور وجوز الهند الي هو عنوان تدوينتي اللطيفة هذه ! 

 

ايش هذا الحلا ؟ 

خلونا نتفق أول إن

*جزر مبشور = الجزر المبشور الي نعرفه.

*جزر مفروم = الجزر الي من بقايا عصير الجزر . 

*نستعمل الاكواب المعيارية. 

طريقته الأصلية  عبارة عن :

• كوبين جزر مبشورة ” مو مفرومة “
• ثلاث أكواب جوز هند مطحون. “مو بالضرورة ثلاث أكواب, نحطه بالتدريج لحد ما نحس إنه تمام”
• كوب ونص سكر . 
• ملعقة طعام زبادي ” مهمتها إنه ترطب الخليط وتسهل مهمة تشكيله”

 

نخلط الجزر المبشور والسكر في طاوة أو قدر على نار هادية, لحد ما يذبل السكر, ولحد ما تطلع عصارة الجزر وتنشف المويه تماما, مهمة نقطة إن المويه تنشف تمامًا اصبروا عليها, بيصير الخليط يلصّق , نضيف عليه بالتدريج جوز الهند وننتبه ما نكثر عشان ما يطلع الحلا جاف معنا في النهاية. لما نحط القدر الي نحسه تمام نخلطه كويس . بعدين نضيف ملعقة الزبادي بعدين نخلطها كويس ونكورها . وترااا خلاص ! بالعافية . فيه ناس يزينون كل كورة بحبة شوكلاتة هيرشي, أنتم ورغبتكم . 

 

بالنسبة للجزر المفروم نستعمله بنفسه الطريقة على نار هاادئة , الاختلاف الي هنا إنه ما رح نستنى مويه الجزر تروح لإنها راحت مع العصير, بس نستنى السكر يذوب بالنسبة للسكر أنا حطيت 3 فناجيل قهوة وحسيته تمام وكمية الجزر الي سويتها أكثر من كوب, يعني ممكن توازنون أنتم السكر الي تحبون, ونخليه شوي كذا حق 10 دقايق مثلا بس ننتبه ما يحترق, نضيف جوز الهند والزبادي و نكوره وبالعافية! صار عندكم كرات الطاقة خاصتكم,ممكن تاخذون منها ثلاث حبات قبل الرياضة مثلاً.أو للأطفال مثلًا , أو حلا غريب في جمعة ناس مثلاً . 

فيه اقتراحات إنه نسوي الحلا هذا بسكر ستيفيا بدل السكر العادي, بس ما جربته وما أدري هل بينفع, لو نفع بيصير هذا الحلا صحي تمامًا ! 

أو بالعسل, بس ما أدري برضه كيف بتكون النتيجة . 

 

تصبحون/ تمسون على خير