قصص إنجليزية

السلام عليكم ورحمة الله وبركاته

أما بعدُ,

فهذه التدوينة ستكون تجميعًا لكلّ الروايات والقصص التي قرأتُها باللغة الانجليزية للاستمتاع و لتطوير لغتي..

غالبية القصص والكتب هنا موجهة للأطفال, اخترت أقرأها لأن لغتها أسهل ولأني أستمتع بهذا النوع من القصص

طبعًا لكل شخص أسلوبه في تعلّم اللغة وتطويرها, فيه ناس يفضلون الكتب الصوتية وهذي بالنسبة لي كنت أسويها ولا زلت للحين أحمل أو أشغل قصص صوتية وأسمعها بين فترة وفترة وأنا في المطبخ أو أمشي أو أسوي شغلة ما تحتاج تركيز في اليد..

أكتب في اليوتيوب learn English through story وتطلع لي كمية قصص تختلف في مستوياتها ..بأحط لكم روابط القصص الي سمعتها..

مشكلتها البعض تجي فيه خلفية موسيقية أو مقاطع موسيقية, فخفضوا الصوت وقتها الله يسعدكم ❤

 

 

the stranger

هذي سمعتها كثيير, كانت أول وحدة سمعتها على ما أذكر, وانصدمت في نهايتها خخ, بس أعجبني إنها واضحة وال”اكسنت” حقها بريطاني, قصتها باختصار إنه شخص غريب دخل على قرية ما فيها فرص عمل وما فيها شباب يشتغلون “كل الشباب يشتغلون في قرية مجاورة” وسوا له سوق بشكل فاجأ أهل القرية ووظف عنده عاملة شابة من أهل القرية وكان أحيانًا يجي صديقها من أيام الطفولة الي صار خطيبها ويساعدها..

من هذا الغريب؟ من فين يجيب كل أنواع الفواكه والخضار الكويسة مرة حتى في الشتاء؟ ايش بيصير للبنت وخطيبها والغريب؟ ايش النهاية العجيبة ؟

 

the girl who disappear

مستواها advance, محقق خاص كان يقصص أظافره في مكتبه “يعني ما عنده شغلة ولا زباين خخ” تجيه وحدة تطلبه المساعدة في اكتشاف مكان أختها التوأم الي اختفت فجأة عاد ويدق صدره وتبدأ المغامرات والألغاز تظهر ..

من القصص الي حبيتها وعدتها أكثر من مرة بعد..

 

the aliens

بنت في الثانوية على “ما أذكر” تحكي مغامرتها مع أصدقائها والمدرس الجديد الغريب الي يتوقعون إنه مخلوق فضائي ! هل توقعهم صحيح؟! 

the dangerous journey

مستواها elementary تحكي عن ناس طلعوا رحلة في غابة ,ايش المصاعب الي واجهتهم وايش صار في النهاية بين الي كانوا ما يطيقون بعض ؟

 

هذي أبرز القصص الي سمعتها, وفيه غيرها بس لأن من زمان سمعتها ما أتذكر أحداثها, وفيه غيرها قصص كثيير شكلها جميلة برضه ممكن تدورون عنها تحت نفس المُسمى  learn English through story ..

الحين نجي للكتب المحسوسة :قلوب كثيرة:

 

مجموعة the diary of wimpy kid

هذي المجموعة مشهورة جدًا, ونزل منها أفلام على نفس المذكرات..

تعجبني مرة القصص الي تجي على شكل ذكريات, أحس كأن الي كتبها يسولف لي مباشرة

هذي السلسلة فيها ميزة الرسومات التوضيحية الي يرسمها jeff, تعطي جو مرة للكتاب هذا غير المواقف المضحكة الي فيه, تعتبر مواقف وذكريات كوميدية غالبًا, فيه قليل مواقف اعتبرتها سامجة بس قليلة جدًا..

الأصفر  the dog day من زماان أخذته من يوم وأنا أولى جامعة ! بس ما قرأته إلا هذي السنة خخ,

يحكي فيه عن إجازته الصيفية وكيف يشوف الفكرة المثالية لقضاء الإجازة وفكرة أمه المثالية المتعارضة مع فكرته تمامًا.

الأزرق Rodrick rules  يحكي فيها عن قصصه مع أخوه الي أكبر منه Rodrick وايش يهبب عليه ضعيف .

 

 

Lizzy Bennet’s Diary 

أتعب أقول هذا الكتاب تحففة فنيية, الرسومات الي جوته, والرسائل المجسمة, أسرني مرررة ❤

الكاتبة استلهمته من قصة اسمها pride and prejudice

استعرته من المكتبة وقرأته وخلصت ورجعته, ويوم جيت أكتب استوعبت إني ما أعرف اسمه مزبوط ولا عندي صورة له أبدًا حسيت يا الله كيف كذا كتاب أعجبني ما صورته..حست في النت ليين لقيته الحمد لله

نفس الشيء عبارة عن ذكريات, أبو البنت أهداها الدفتر عشان تكتب فيه رواية بس مرت الأيام وهي تكتب فيه ذكرياتها ويومياتها الي صارت أشبه بالرواية, هم من عائلة متوسطة ينقل فجأة عندهم واحد من طبقة راقية ويوم من الأيام وهي وأختها يتمشون في الأرياف يشوفون هذا الي من طبقة راقية على حصان هو وصديقه وعاد يُعجبون فيهم, وتمر الأيام ويسوون احتفال ويجتمعون كل العوائل الي عندهم بنات للزواج ومنهم عائلة ليزي الي فيها 5 بنات ..

القصة كأنها من عصر سندريلا, أعجبتني الرسومات الي فيه مرة وكيف تكتب ليزي انها ايش بتلبس وتحط صورة الشريطة الي بتلبسها, وايش التطورات في صدرية أبوها الي تطرزها “والي بيلبسها بعدين في زواجها”

وكيف اكتشفت هي وأختها من مرة خالهم إن الموضة الدارجة هي الفساتين بكم طويل

اليوميات غالبًا عن قصص حب ليزي وكيف تلقى الرجل المناسب في النهاية وتوافق على الزواج منه

لغته شوية متقدمة. بس رسوماته جميلة ياخي -> ثالث مرة أقولها .الكتاب عامة جميل وظريف ولطيف ..

 

 

The Creakers 

قصة جمييلة وتشد الواحد يقرأها مرة وحدة, الوصف فيها ممتع جدًا وكأنك تشوفين فلم أنمي قدامك تخيلته مرة من أفلام ديزني لاند ..

اختصار القصة إنه في قرية يقومون الأطفال في الصباح ويلقون آبائهم وأمهاتهم وكلل الكبار مختفين من القرية, بعدها تلقى لوسي نفسها هي قائدتهم وفي الليل تطلع مخلوقات غريبة من تحت أسرة الأطفال تكتشف أمرهم لوسي وصديقها الجديد نورمان, ويكتشفون عالم هذي المخلوقات ومكان الكبار المُختطفين ويقررون يرجعونهم بأي طريقة.. عاد الأطفال مبسوطين إن معد فيه كبار في حياتهم يقولون لهم سووا كذا ولا تسوون كذا فتحولت القرية إلى فوضى عارمة, حسيت في القصة توضيح بشكل غير مباشر لمأساة النفايات والفضلات في العالم, وأهمية إعادة التدوير حتى نقلل من النفايات في حياتنا.. أعجبتني طريقة الكتابة لكلام المخلوقات الغريبة فعلاً كأنك تسمعينهم وهم يتكلمون.. الكاتب بين فترة وفترة يطلع لك ويسولف معك شوي عن القصة بعدين يكمل القصة ..على النهاية بديت أحس بشوية مبالغة بالنسبة للوسي وكيف إنها مرة بطلة بشكل خيالي وحتى الكبار ما يدرون وش الطبخة وهي بس الي تدري

بس أتوقع هذي الخيالية في الموضوع لأن الكتاب موجه للأطفال, فممكن الكاتب كان يبغى يعزز جانب الثقة في النفس عند الأطفال .

عامة القصة كانت ممتعة ومثيرة .

 

Heroes and villains 

لأن غلاف الكتاب ورقي, وانشق, فصورت لكم صفحته من جوا ..لو  تسائلتم يعني خخ

هذا الكتاب يضم أربع قصص 

القصة الأولى  the enormous crocodile 

تحكي عن تمساح ضخم ملّ من أكل الأسماك ويبغى ياكل طفل حقيقي, ايش الخدع الي يسويها عشان يصيد الأطفال وكيف تبوء كل حيله الذكية بالفشل.

 

القصة الثانية  the graffe and the pelly and me 

ولد صغير يلتقي بزرافة وقرد وطائر ويطلعون هذولا مسوين شركة تنظيف فجأة يجيهم طلب لتنظيف بيت أكبر بيت في المدينة مدري القرية وهناك يكتشفون حرامي حسب ما أذكر ويساعدون جلالة راعي البيت للإمساك بهذا الحرامي ..

 

القصة الثالثة the twits

كل القصتين الأولى تعتبر حلوة لكن هذي ما حبيتها تحكي عن واحد وزوجته مرة وسخين وقبيحين ! كيف عايشين حياتهم وكيف يصيدون العصافير عشان ياكلونها وعندهم عائلة قرود يعذبونها وفي النهاية تجتمع الحيوانات وتنتقم منهم ..القصة سامجة ولا أحس يخرج الواحد منها بفايدة غير المفردات اللغوية ..

القصة الرابعة George marvelous medicine

قصة عادية برضه, أحسن من القصة الثالثة, تروح أم جورج للمدينة وتخلي ولدها مع جدته الي يكرهها “الجدة ما تنحب أصلا “, ولما يجي موعد الدواء بدل ما يعطيها دوائها يسوي لها عقار ثاني يخليها تصير ضخمة ! , بعدين يجربون هذا العقار على الدجاج والبقر في مزرعتهم ويتحول إلى دجاج وبقر ضخم ! وينبسط أبو جورج ويسأل جورج كيف سوا العقار عشان يسوي كمية منه ويبيعها على المزراعين وهنا تجي المشكلة إن جورج ما يدري وش المقادير بالزبط! دخل كل غرفة في البيت وأخذ الي ممكن يحطه في القدر “حتى الي مو ممكن يحطه”

المهم ويحاولون يوصلون لخلطة هذا العقار المذهل !

فيه أداء مسموع لهذي القصة ممكن تسمعونها هنا  george marvelous medicine

 

لهنا خلصت قائمتي المتجددة بإذن الله..

 

خلوكم قريبين, وشكرًا :ورود: