منتجات ثابتة

بسم الله الرحمن الرحيم ..

أول ما قرأت موضوع التدوينة هذي طرأ ببالي إني بأتكلم عن منتجات لازم تكون معي وحتى لو خلصت أرجع أطلبها أو آخذها سواء من مكياج أو غيره ..

بعدين كأني اكتشفت إن المعني المنتجات المكياجية والتجميلية فقط,

لكني بأستمر بكتابة هذي التدوينة مع تخيلي الأول وكأني ما اكتشفت شيء 😅

 

في التدوينة هذي بأتكلم عن المكياج, ومنتجات البشرة, وبعض المنتجات المطبخية ..

 

أول شيء بالنسبة للمكياج, فالأشياء الي ما أستغني عنها لو بأسوي مكياج خفيف عبارة عن :آيلاينر, مسكرا, بلشر, روج ثابت.

ولو بأسوي مكياج بسيط لأمسية خارجية أزود عليهم البيبي كريم والكونتور والإضاءة.

 

الآيلاينر مؤخرًا صرت أستعمل الجل, الي يجي في علبة ومعه فرشة, أخذته من ميبلين, وحليّل صراحة, يبقى إن الي كنت أستعمله قبل أحسن بالنسبة لي 

بس لأني ما أحب أشتري منتج وأنا عندي زيه, ولأن الجل من ميبلين كويس فما رجعت أخذت القلم, مع إن القلم أسهل وأريح, وسواد هذا القلم بالذات جميل. فإذا خلصت الجل ممكن أرجع آخذه هو أو أشوف واحد نفس الجودة من ماركة ثانية أرخص 🤔

 

بالنسبة للمسكرا فمسكرات ميبلين جميلة جدًا بالنسبة لي وهي الي أنا عليها منذُ مبطي..

لكن آخر مسكرة أخذتها كانت من ماركة برجوا

مرة جميل ما شاء الله التكثيف والتطويل حقها, ولو حطيتي منها كذا طبقة يصير كأنك لابسة رموش “إحساسي”

 

بالنسبة للبلشر فعندي اثنين الي مرة أحبهم وممكن مرة أحط من هذا ومرة أحط من هذا

الأول من ميك اب فور إيفر

الي عندي رقم 415 ,يعجبني البلشر الكريمي وأحسه يثبت أكثر ودمجه سهل بالنسبة لي, يمدي يُستعمل كروج بعد بس ما قد استعملت هذا كروج .

 

الثاني

مرة مرة جمييل, يُستعمل ك روج وبلشر, وكثير أستعمله روج وبلشر عكس الي فوق. دمجه سهل بالنسبة لي ..” أدمج وأوزع باصبعي اللطيف أو اسفنجة السيلكون”

 

بالنسبة للروج فأكثر شيء معتمدته الأرواج المات خاصة أرواج كايلي, بس لأنها تقشر الشفايف ما أستعملها إلا للمناسبات, لليوم العادي أستعمل أي روج عادي مو ثابت, وأفضل ماركة ريفلون

تحسينها تنعش الشفايف, خاصة إنها تجي بريحة النعناع أو نكهة النعناع مدري كيف بس لما تحطينها تبدأين تحسين بإحساس جميل وإن شفايفك تمتص هذا النعناع الموجود في الأرواج.

 

هذا بالنسبة للمكياج,

بالنسبة لمنتجات البشرة الي ما أستغني عنها فهي كالتالي:

 

كريم البشرة الي صنعته

الزيادة إني لقيت في قسم الرحلات هذي العبوات السيليكون, فصرت أحفظ الكمية الي بآخذها معي في الشنطة فيها

 

 

زبدة الككاو من بالمرز

زيت رزينه

 

فرشة تانجل تيزر

 

كل هذي الأشياء تكلمت عنها من قبل هنا  عنايتي الشخصية !

زيادة عليها خلطة الشعر الي صنعتها هنا خلطة طبيعية للشعر

 

بالنسبة للمنتجات الأخرى المتعلقة بالمطبخ..

بهارات المطبخ من أمي الله يحفظها.

فيه تشكيلة للبهارات : بهارات رز وبهارات إيدام وبهارات معمول وصينية وكاري وإيطالية ..

الأساسية بالنسبة لي هي بهارات الرز والإيدام والإيطالية

ولأن أمي الله يحفظها هي الي تسويها فالحمد لله ما أنقطع منها 😍

تعطي الأكل بُعد مختلف حقيقة, البهارات الإيطالية بالذات ريحتها تجننن وطعمها شيء ثاني ما شاء الله, ولأني أعرف قد ايش أمي تعبت عليها وكيف إنها تاخذ البهارات كاملة وتغسلها وتنخلها وتجفف الي يحتاج تجفيف وتطحنها بطاحونتها الخاصة ما شاء الله لا قوة إلا بالله ..فأقدر بكل ثقة أنصحكم تجربونها..عاد إن شاء الله يكون باقي عندها في المخزن حقها ..”تحفظها في فريزر خاص للبهارات”.

 

الماجي الصحي “مرقة خضار صحية”

قد فكرت مرة أستغني عنه بس فيه أكلات أحس يعطيها الماجي نكهة مميزة, زي الرز والجريش والمكرونة وهيك أشياء..فهذا بالنسبة لي صديقي , كذا مرة يخلص وأرجع آخذه, خاصة إنه يُعتبر بديل صحي للماجي.

 

كوب كونتيغو 

“بالاسباني معناها :معك”

الي يعرفني مرة يعرف حكايتي مع قوارير المويه, أخذت بلاستيك وقزاز بس ماش ما اقتنعت, الستيل الي زي قارورة المويه بالزبط شكله جميل ويحفظ الحرارة بس أستصعب إني كل ما أجي أشرب لازم أفتح الغطا..💁

كان عندي معايير في قارورة المويه الي أبغاها ..

*تحفظ البرودة.

*سهلة التنظيف.

*بسرعة أشرب منها

*حجمها مناسب سهل أشيله معي بكل مكان.

وبالصدفة الحمد لله لقيت هذي في مكتبة جرير, سعرها غالي بس فيها كل المعايير الي حطيتها الحمد لله, الشيء الجميل بعد إنها تنفع مرة حتى للأشياء الساخنة, و مُصممة إن نسبة الحماية فيها عالية, يعني مهما تشقلبت أو شيء في الشنطة ما يتسرب منها شيء الحمد لله.

 

وبس كانت هذي مقتطفات من منتجات ثابتة معي والحمد لله على كلّ نعمه ظاهرة وباطنه 💙